奧柏‧御峯採「雙露台」設計。
放假約Friend傾心事唔知去邊好？今期《睇樓逐呎度》嘅大角咀奧柏‧御峯就係一個好去處，一個唔夠300呎嘅單位仔，採用開放式格局，成間酒店房咁，但竟然有「雙露台」設計，真係一等一嘅「奇則」。
話說呢對露台面積唔大，各自只夠企一個人(冇錯，係一個人)，但奇就奇在夠近，同老友隔住「露台」傾心事話咁易，係咪好新奇又有趣呢？如果奇異博士肯賞面，表演瞬間移動，由一個露台變去另一邊，咁就拍硬手掌喇！
今次《睇樓逐呎度》參觀奧柏‧御峯1座高層G室，實用面積274方呎，係屋苑嘅入門戶型。雖然行入單位一眼睇晒，廳房合二為一，但室內長逾15方呎，闊逾12方呎，加上樓底高近11方呎，空間感認真唔錯，仲有少少酒店房Feel添！
單位盡頭設有落地玻璃窗，兩邊採雙露台設計，外連露台及工作平台，方便欣賞美景之餘，同時引進充足光源。由於呢對露台分開而建，面積又唔算大，開Party有少少難度，但約埋三五知己把酒談心話咁易喇！
入門口位置為浴室及開放式廚房嘅所在地，其中浴室面積唔夠30方呎，只能擺放企缸，唔算闊落；至於廚房為開放式設計，小心煮食時室內滿布油煙。
奧柏‧御峯係大角咀新進屋苑，落成約4年，2座大廈提供462伙，主打開放式單位，迎合單身一族嘅Lifestyle。由於走精品住宅路線，無論用料、配套設施都落重本，尤其係住客會所更係豪氣十足，設施包括歐式花園、戶外泳池、健身室、宴會廳等等。
香港置業鄺偉源表示，近月九龍多個新盤推出迷你單位應市，搶走二手客源，拖累奧柏‧御峯開放單位成交減慢，部分業主索性封盤靜觀其變。他續說，現時同類放盤只有7個，叫價460萬元起。而屋苑新近有高層開放式單位以455萬元易手。
來源 source: http://hk.on.cc
|
鍾意就快D Share啦！
|
|
|
