歌手陳奕迅（Eason）上月底終於完成歷時三年多的134場世界巡迴演唱會，估計身家將暴漲2億，可謂大豐收！不過他就詐傻指不知自己如此有錢，因他從不在意進帳多少，更笑言自己依舊要着爛鞋：「係咩？我有咁多錢咩？我冇特別注意，咪又係着緊啲爛鞋，因為錢唔係令我最有滿足感，我唔係好理，都係咁過。」巡唱過後，終於能好好休息叉電的Eason，表示閒時會去行山呼吸新鮮空氣，不過他之前行山不慎令腳部受傷，所以受訪當日要負傷上陣。
Ready造人
談到太太徐濠縈曾想趕「尾班車」造人，追多個小朋友，Eason就笑言太太只有對外講，回家後未有告訴他，平日真性情的Eason更突然怕醜起來，他說：「我Ready㗎！但我唔係諗住造嗰個人，我係諗住做好我自己呢個人。嗰啲隨緣啦，我哋睇Mood，食番餐好嘅，製造吓氣氛，製造呢啲唔講啦，咁尷尬，得㗎喇，有就有。」
未忘記香港歌迷
雖然Eason之前忙於巡唱，但作為香港歌手的他未有忘記香港歌迷，早前就推出全新廣東歌《四季》讓香港歌迷止渴：「香港歌迷未必鍾意我唱國語歌，雖然大家聽得明，但唔係最直接，要喺個腦度翻譯，而廣東歌就最直接。」又指歌曲已在三年前錄好，原先打算重錄新版本，卻被公司制止：「佢哋覺得我唱唔番嗰時嘅感覺，我話唔試又點知，我話畀錢再錄佢哋都話唔使，不過依家我都真係相信唱唔番。」
想試唱韓文歌
滿腹大計的Eason除了想出翻唱碟外，亦透露想嘗試唱韓文歌，因他認為音樂不應受語言限制，有時可「入鄉隨俗」，像韓星宋仲基、池石鎮到中、港、台時會選唱華語歌：「啲人話你香港人做乜出隻國語歌？咁已經有個隔膜，其實唔需要呢啲隔膜，唱歌之嘛，所以韓國人咪叻囉，佢哋到唱韓文歌大家一樣咁冧，但佢會唱隻大家有共鳴嘅。」
唔出席樂壇頒獎禮？
而Eason透露有時會想，到底其他人對香港的音樂有何看法：「以前啲外國人諗起中國就係龍、筷子、旗袍、功夫，依家真係International嘅仲有咩？（你想進軍荷里活？）又唔係嘅。（Bollywood？）都幾正呀！印度市場好大呀，泰文我都有諗過，雖然王敏德做咗先，所以我真係好多嘢諗㗎！」臨近年尾，又是各大樂壇頒獎禮的季節，Eason指仍未知道會否出席，要問經理人，而屆時亦不排除會去旅行：「都斷晒層好耐㗎啦，我都好多年冇去喇，有成兩、三年。」
髮型：Derek Li@Xenter
化妝：Karry Wong
場地：心燒食堂
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|
