網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2016年11月10日 星期四

蕙禎 BB中途換衫 為咗散水? [壹週刊 - 1392] __,M1,

本來蕙禎BB就係著住長裙、揹住小手袋,一副文青look去遊行,入夜之後,佢仲係以呢身造型,去同警方理論。眾人諸事蕙禎BB中途換衫 為咗散水?星期日中聯辦外衝突中,被一眾攝影記者形容為「總會喺鏡頭前出現」嘅青政游蕙禎同梁頌恆,中途唔見咗人,大家以為佢哋提早散水,但原來返咗立法會換衫。臨清場前,蕙禎BB就突然換咗衫,T恤熱褲上陣,跑得快啲之餘,混入人堆當中,同普通MK妹無乜分別。(莫智謙攝)話說蕙禎B ...


本來蕙禎 BB就係著住長裙、揹住小手袋,一副文青 look去遊行,入夜之後,佢仲係以呢身造型,去同警方理論。

眾人諸事

蕙禎 BB中途換衫 為咗散水?

星期日中聯辦外衝突中,被一眾攝影記者形容為「總會喺鏡頭前出現」嘅青政游蕙禎同梁頌恆,中途唔見咗人,大家以為佢哋提早散水,但原來返咗立法會換衫。

臨清場前,蕙禎 BB就突然換咗衫, T恤熱褲上陣,跑得快啲之餘,混入人堆當中,同普通 MK妹無乜分別。(莫智謙攝)

話說蕙禎 BB同梁頌恆晏晝參加反釋法遊行時,本來都著得斯斯文文,蕙禎 BB仲著住長裙、孭咗個白色小手袋行足全程,之後仲去埋中聯辦,不過就無走在最前線,只係喺附近行嚟行去。但當示威者衝擊警方防線而「中椒」後,蕙禎 BB又以佢嘅文青 look,當住鏡頭前幫示威者洗眼。

不過轉個頭,現場已經唔見咗佢兩個,唔通咁就係勇武同抗爭無底線?原來佢兩個失蹤係有原因嘅,據講梁頌恆都食咗椒,問人借咗件衫換,不過都係頂唔順嗰種火燒難受感,於是返咗立會沖涼再換衫;至於蕙禎 BB,就直程換番短袖 tee加熱褲仔同波鞋,兩個再喺清場前出現喺示威現場,然後話形勢不利,於是叫大家散水。

咁天生腳長嘅梁頌恆,自然跑到好似飛毛腿,轉眼就去到上環搭的士走;蕙禎 BB都唔弱,本來一直企喺東邊街同電車路交界,速龍小隊嚟到,換咗波鞋嘅佢亦跑到唔見影。

所以話,想「不受傷、不被捕」除咗要跑得快,換番套啱場合嘅衫都好緊要。

梁耀忠縮沙有手尾 街工有人跳船

新一屆立會開鑼時選主席,街工議員梁耀忠突然「縮沙」自動放棄主持會議,當時唔少泛民中人都打個突,因為之後換咗石禮謙頂上,變相幫咗梁君彥,令佢就算英籍問題纏身都可以極速上位做主席。

街工上星期三就喺 facebook公布,有三個執委同埋梁耀忠齊齊辭去職務。阿忠表明呢個決定係同放棄主持會議事件有關,並會提前喺下個月至明年一月進行執委改選。據知,辭職嘅執委,亦包括今屆立會選舉中,敗選新西嘅黃潤達(右圖)。

查實,阿忠「縮沙」呢單嘢,唔少街工成員都好㷫,有成員仲喺事發當日高調宣布退黨,而辭職嘅執委亦唔肯講太多,只係講咗句「家門不幸」。有成員又話,阿忠當日走出會議廳,有街工議助同埋自決派成員勸佢入返去主持會議,但佢唔肯;出事當日街工有 call過緊急會議,但阿忠都係 no show,搞到唔少成員好嬲。最慘更搞到星期日反釋法遊行時,街工嘅隊伍都俾其他示威者鬧,聽落都覺無癮,跳船真係一啲都唔奇。

立法會選主席時,梁耀忠突然縮沙唔肯主持會議,變相幫咗梁君彥,辣㷫唔少街工成員,仲有人跳船添。(鄒潔珊攝)

幫你回帶:釋法變色龍 湯大狀現真身

宣誓風波由政府入稟司法覆核到中共強暴釋法,近排,唔少傳媒就釋法問題去訪問資深大律師湯家驊。唔知係《壹》仔記性好,定係喜歡幫人回帶,《壹》仔好記得,湯大狀曾經講過,自己人生轉捩點就係因為中央一次又一次釋法,逼到當年不問政治、身為前大律師公會主席嘅佢,要上街、成立關注組,然後再去參選立法會。

湯大狀當年話,因為心中一把公義之劍,結果令佢踏上另一條路,佢仲寫咗本書,叫《從釋法那一天開始……》。佢○五年評論釋法仲講人話:「不能公開允許和提倡以解釋法律來代替修改法律,否則會對法制的權威和統一產生不利影響。」

之不過,只係幾年時間,湯大狀嘅睇法,可以一百八十度改變。呢位自誇一年同京官見面四、五次嘅溝通員,早兩日講釋法時,就話「釋法係本港司法制度一部分」,仲話「响法院有裁決前釋法,傷害較小」喎。以今日的我,打倒昨日的我,湯大狀完全無臉紅,變色龍當之無愧。

一年同京官溝通見面四、五次,湯家驊變色後,應該愈撈愈掂。(《蘋果日報》圖片)

釋法議題係一面照妖鏡,當年湯家驊(黃圈)全身黑衣帶頭反釋法,如今卻說︰「釋法係本港司法制度嘅一部分。」

珠姐「過底」染紅

近排珠姐猶如中共最權威傳聲筒,頻頻為釋法問題向傳媒解畫。

其實,變了色的,又豈止得一人。近排經常出現、做中共最權威傳聲筒嘅港區全國人大代表兼基本法委員會委員譚惠珠,响八九十年代被殖民政府扶植,佢受幾代港督包括麥理浩、尤德、衞奕信等重用,甚至「空前絕後」做過行政局、立法局、市政局同區議會「四料議員」。

但係,人稱「珠姐」嘅佢,家吓就轉咗效忠中共。查實「珠姐」點解會「過底」?佢嘅人生轉捩點,可能就係當年佢擔任交諮會主席期間,被《壹》仔揭發佢持有「先達的士公司」大量股份但未有申報。呢啲咁嚴重嘅利益衝突,當年佢就企圖向傳媒高層施壓干預新聞自由,結果被港英政府唾棄。

佢嘅政治仕途,本來畫上句號,不過,多得中共睇中收留,而家七十有一都仲老而不休,繼續做中央紅人添。

撰文:巫不言

news@nextdigital.com.hk


鍾意就快D Share啦!