娛樂偵訊
葉翠翠四個月現晒巨肚 生完即追隨時退出
葉翠翠去年跟建築師兼公司董事周曉東（ Raymond）結婚後，即不設防密密造人，雖然食過詐胡，但努力一年終於得米！葉翠翠已經有餡四個月，感動到喊的 Raymond落令老婆停工；原來早前拍劇體力透支，一度病倒入院。為求老婆輕鬆佗 B同繼續追，計劃生四個的 Raymond決定落閘，要翠翠退出娛樂圈。
幸福小女人
十幾日前，本刊拍到葉翠翠同老公周曉東在太古廣場拍拖入貨，著平底鞋鬆身衫的葉翠翠挺住四個月肚，人逢喜事，將升呢做老豆的 Raymond邊揀食物，邊攬錫老婆， sweet爆。
在超市轉了幾個圈， Raymond在凍櫃掃了大堆芝士，之後去買果汁，大部分都是適合孕婦的營養食品，放入手推車前，他必定細心做 QC，睇清楚食物標籤及成分；有愛妻號把關，葉翠翠一於做幸褔小女人，一切交由老公決定。
行了半個鐘，在雪糕櫃前徘徊了好一陣的翠翠，突然又改變主意走去買麵包和朱古力冬甩。
肥肚唔肥人
「翠翠同 Raymond都話 BB係上天送俾佢哋嘅禮物，因為翠翠喺生日前知道有咗，預產期就同老公生日日子好接近。有咗之後，大肚婆胃口不知幾好，但佢 keep住做啲簡單運動，所以都係肥咗落個肚，手腳都冇乜長肉。」知情者說。
為了做媽咪，葉翠翠年多前開始睇中醫調理身體，加上老公改變飲食習慣全面配合，兩公婆都十分謹慎，不過自從六月埋位拍《愛．回家之八時入席》後，早開夜收，體力透支，幾乎前功盡廢。
入院吊鹽水
「翠翠近年都係做主持多，已經有一段時間冇拍電視劇，就算拍，都係輕輕鬆鬆客串幾集，所以監製搵佢開新劇仲要個角色度身訂造，就即刻應承。但因為太耐冇試過咁長時間開工，朝早六點入廠，凌晨四點半要起身，跟住拍到夜晚八、九點；佢試過一個月內睇咗八次醫生，好容易就感冒，有次仲辛苦到要入醫院吊鹽水。
「嗰次之後，翠翠同監製商量過決定辭演，一來身體真係頂唔順，加上 Raymond唔想老婆捱得咁辛苦，兩公婆為咗生 B做咗咁多準備，真係唔想身體又再變差。九月生日後翠翠足三十五歲，已經步入高齡產婦階段，所以愈早生愈有着數。」
望生四個
老公講明想生四個，葉翠翠全面配合，打算生完即追第二個，肚皮有排忙，生完仲要湊， Raymond早已游說老婆退出。
「翠翠做嘢好上心，容易緊張，有咗之後， Raymond已經叫老婆即刻停工，最好就退出幕前唔好再做。翠翠雖然口頭應承，但同無綫仲有約，不過嚟緊呢一年就一定開唔到工。其實兩公婆傾好咗生完即刻又嚟過，最理想係一年一個，生夠四個先收工。所以之後會唔會再做娛樂圈，翠翠自己都唔敢講到咁實在。」知情者說。
養生全面睇
一追再追
藝人偏向遲婚，所以婚後都不設防趕造人，唔少更生完一個緊接再一個，追到夠數為止。
陳豪 三年抱三
13年，陳豪與陳茵媺奉子成婚，同年 12月誕下長子陳梓燁， 15年 2月次子陳浩鋒出世，今年更成功追埋個女 Camilla，三年抱三，證明陳豪造 B能力超強、陳茵媺更好生養。
徐子淇 好字起孖
06年尾，徐子淇下嫁李家誠成為千億新抱。翌年 7月先誕下長女李晞彤， 09年再添一女李晞兒， 11年長子李俊熹出世後，五年抱三，徐子淇休息四年，去年再誕下幼子李建熹，兩個「好」字在手，收得工！
雞年旺生 B
歌仔都有得唱，「雞，全部都係雞，全部都係雞……」冇錯，明年出生的 BB，全部都係雞 BB，無論雞仔還是雞女，總之雞年旺生 B。
楊愛瑾
今年四月下嫁永安太子爺郭永淳，結束八年愛情長跑，婚後不設防的 Miki本月初在 ig留言：「 Hey little thing, you make us go wild！」公布有喜。
Angelababy
去年十月和黃曉明結婚後，已多次傳出 Baby懷孕消息，上月廿一日，黃曉明在微博上載與老婆的出海背影照，並寫下：「三個人的旅行，以後還要一起很多次，感恩，媳婦兒∼」，向外證實將為人父。
撰文、攝影、攝錄：娛樂組
|
鍾意就快D Share啦！
|
|
|