雖然 Eason出面撐，但阿徐心情仍未好番！
探熱針
撐老婆 超儀剝阿徐皮 Eason㷫爆
因為放相上私人 IG而令陳子聰消瘦病容曝光的徐濠縈，雖然已向何超儀道歉，並獲對方表示原諒；但事隔兩個月，超儀卻公開寸爆阿徐有分享症，又自稱討厭分享，聲言同阿徐冇聯絡。
舊事重提，超儀此舉即時辣着愛妻號 Eason，更同友人鬧爆對方「講一套做一套」，專登搞大龍鳳落阿徐面，表明以後冇朋友做！
舊事重提
老公陳子聰病容曝光，何超儀至今仍耿耿於懷，早前更公開寸爆徐濠縈有分享症，聲言討厭同人分享的她又直指與阿徐已經再冇任何聯絡，毫不留情地數落昔日好姊妹，令曾表示同超儀尚有聯繫的阿徐，更加冇晒面。
為此，徐濠縈心情極度不佳，老婆愁爆，身為老公的陳奕迅，亦對超儀所作所為有微言。
「阿徐放相上私人 IG，純粹係佢見子聰好番好多，戥對方開心，冇諗過會俾人攞咗嚟登。不過，佢都知道係自己大意疏忽，所以都即刻打電話同超儀道歉認晒錯，就連 Eason都有親自打俾超儀，當時超儀仲話知道阿徐係冇心，唔會放喺心度，叫佢兩公婆唔使擔心。
「點知件事過咗成兩個月，超儀忽然又攞出嚟講，仲寸爆阿徐有分享症，講到好似佢有心放料咁，阿徐真係好唔開心！ Eason亦有同身邊幾個朋友狂呻，話超儀講一套做一套，專登搞場大龍鳳出嚟落阿徐面！咁以後唔好再做朋友囉！」知情人說。
嫌疑最大
事實上，當得知陳子聰有病， Eason兩公婆都相當擔心，後來醫生批准陳子聰放假出院，超儀想搬去酒店住，等老公靜養，當時阿徐都有份陪超儀去搵地方。
「就係因為阿徐同超儀去睇過地方，所以先會被懷疑放料，佢冇諗過，大家識咗咁多年，超儀都唔信自己，所以阿徐先咁唔開心！」徐濠縈身邊好友說。
好姊妹
徐濠縈與何超儀相識超過廿年，當年阿徐和 Eason拍拖，也是超儀做紅娘撮合，多年來，阿徐同超儀好似孖公仔咁，互相見證人生重要階段。
Eason榮獲博士
14年，陳奕迅獲英國母校倫敦金斯頓大學頒授「 Honor Degree of Arts」榮譽博士，表揚他對音樂上的貢獻， Eason一家飛英國觀禮，何超儀夫婦及一班好友亦有拉大隊到賀。
撰文、攝影、攝錄：娛樂組
|
鍾意就快D Share啦！
|
|
|