日前榮雪梅孖老外男友到淺水灣撚狗兼 happy hour，二人坐在沙灘旁的餐廳，望住海談心。
名人動態
同意籍前夫分合九次 榮雪梅止血啜爆新老外
淡出 ball場多年的 46歲名媛榮雪梅，跟結婚十多年的意籍前夫 Stefano離婚收場， 12年，榮雪梅難忍老公爛滾，主動提出斬斷夫妻情分，更自爆在過去五年，雙方曾分手九次。
失婚後，她寄情工作，發展個人時裝品牌；直至去年 10月，二人曾突然翻撻，不過事隔一年，榮雪梅又再一次同前夫斬纜。欲斷難斷的關係，隨着第二春的出現，榮雪梅跟新老外男友赤柱拍拖攬啜，終於又告一段落。
藕斷絲連
跟前夫育有一子的榮雪梅，一二年宣布離婚後，跟女友 Lily合作時裝品牌，因為要經常返內地，近幾年已幾乎絕跡社交場合，即使偶然出席活動，也是著自家品牌做生招牌。
同前夫藕斷絲連的她，去年被發現重修舊好，拍拖行超市買餸玩煮飯仔，但事隔一年，二人又分開。
「其實 Helen（榮雪梅）好鍾意 Stefano，就算個男人出軌咁多次，佢都繼續俾機會，不過 Stefano死性不改，佢今次應該真係死心。」知情者說。
因為，榮雪梅已有第二春！日前本刊便發現她跟新歡在赤柱拍拖，二人坐正餐廳門口位，跟男友黐到實的榮雪梅歎住白酒，曬住太陽談心，講講吓更攬實男友肉緊啜，對方亦反應十足，錫女友面珠回禮，閃爆。
坐又啜行又啜
由頭啜到尾，依然唔夠喉！離開餐廳行去攞車的一段路，拖住狗狗的榮雪梅又開始分心，主動啜啜，男友亦順勢攬實她，二人打得火熱。
「 Stefano唔識得珍惜佢， Helen受嘅傷害好深，但佢天生要愛情，拍拖百分百投入，有冇將來反而唔會諗太多。」知情者說。
年多前榮雪梅因為時裝生意，已搬到深圳長住，為了新戀情，惟有頻撲香港、深圳兩頭騰，唔可以日日見，肉緊啲，正常！
一代 Ball后
在四川出世的榮雪梅， 14歲舉家移居加拿大，父親曾是軍官，母親從事地產及股票投資。榮雪梅 98年在派對認識意籍前夫 Stefano，拍拖兩年結婚並育有一子 Charles，今年 18歲。
喜歡出入 ball場的榮雪梅， 05年靠 deep V透點在社交圈一鳴驚人，成為新一代 ball后；多年來她不時傳出與老公各有各玩， 05年更被拍到攬洋漢狂嘴；同年又傳與 72歲的富豪陸增祺關係密切，曾被拍到與兒子及陸增祺一同行超市、繑手睇平治。至於 Stefano， 08年亦曾於澳門拖女斷正。
離婚後，榮雪梅已甚少公開現身，去年她與好友 Lily合資八百萬，在深圳創立時裝品牌「 Lily& Helen」，由 ball后變成女強人。
撰文、攝影、攝錄：娛樂組
|
鍾意就快D Share啦！
|
|
|