吳思諾
八卦陣
男神女神 選選委
今年參選選委名單之中，都有幾多年輕一代，有唔少仲係八、九十後，佢哋唔單只關心社會，外形仲相當養眼，絕對可以稱得上男神女神。
法律界仙氣女神
法律界嘅女神代表，就有已故民主派「三料議員」吳明欽個女、法政匯思成員吳思諾（ Senia）。廿八歲嘅 Senia做咗大狀冇耐，一出道就係同師傅李柱銘一齊搞鉛水案，亦都係公民實踐培育基金裡面最年輕嘅董事，更加喺港大法律學院做兼職講師，睇得又打得。
長腿建築師
建築、測量、都市規劃及園境界嘅 CoVision16團隊，有個廿九歲嘅助理駐地盤建築師陳堯坤，佢張候選人簡介相片就好似普通證件相咁，平平無奇，原來佢真人都幾高，有「長腿建築師」稱號；佢之前同姚松炎一齊搞單車活動、擺街站，留有少少鬚根，不知幾 man。
九十後 chok男
廿五歲嘅黃瑋彤直程係九十後，平時唔多覺佢有型，但佢一 chok住影相，略帶憂鬱嘅眼神，再加上若隱若現嘅鬚根，原來都幾睇得吓。佢啱啱喺英國讀完書返嚟，參選講明支持拉布，因為覺得做人唔係淨係保住自己飯碗就算，一定要關心社會。
工程界大眼美人
工程界民主派二十人團隊「進步工程」唯一女將、三十三歲嘅麥雪晶，人如其名，有對亮晶晶嘅大眼睛，佢講明即使工程界選民偏向溫和，佢都唔會為選票埋沒良心，支持香港發展之餘，都要反思吓點解政府要將大白象工程推上馬。
熟男型棍
另一個參選法律界選委嘅，係行內嘅型棍大狀石書銘（ Randy），幫過唔少示威者打官司，可以話係濫權警察嘅剋星，真人似三十幾歲嘅 Randy，原來已經係四十有五，可以話係熟男型棍，不過佢真人型過影相囉！
醫學界羅志祥
醫學界新進男神、廿七歲嘅張臻善（ Jason），係公立醫院急症室駐院醫生，真人有啲似台灣藝人羅志祥。 Jason平時都有夾吓 band表演，唔怪得企出嚟講嘢都唔怯場，炮轟政府有錢搞大白象工程，但走去 cut醫療開支。
買定離手未？劉鳴煒轉軚唔撐 689？
星期日（ 11/12）就係選委選舉，唔少候選人都喺網上積極拉票，接觸選民，包括參選社福界嘅八仙嶺大火幸存者張潤衡。佢上星期五喺 facebook貼文，話作為社福界一員，必須關注政治、參與政治，保障社福界利益。身為自由黨黨員嘅佢，仲講明會將呢幾年喺社福界前線嘅所見所聞，一一轉達俾每位特首候選人知道，仲標明包括 CY，「雖然我不會投他一票」。
呢個 status一出街，短短四十五分鐘，就有四十四個人讚好，睇真啲，原來大劉個仔、華人置業主席劉鳴煒都有份 like，唔通佢都撐唔投 CY？《壹》仔 check過，個 facebook戶口係真．劉鳴煒嘅。
上屆特首選舉時，劉鳴煒本身屬「唐營」，扮財神同唐英年落區宣傳；不過到 CY當選上任，劉亦非常識時務，轉投「梁營」後，去年被委任為青年事務委員會主席。早前，劉透過梁振英促成捐款近四億港元俾瑞典卡羅琳醫學院，後來傳媒發現梁長子梁傳昕喺該院校進行博士後研究工作，而梁並無就促成劉捐款一事作出利益申報。究竟今次劉鳴煒會撐邊個做特首？買定離手好喎。
擺明歧視 明文規定精神病人不獲發回鄉證
中央扮釋出善意，解禁對香港非建制派人士申請回鄉證嘅限制，所謂愛國愛港人士立即上綱上線，喺星期日嘅《城市論壇》，教聯會副主席蔡若蓮就話用回鄉證係承認自己回鄉，仲話唔認自己係中國人就唔使申請回鄉證，可以用簽證喎！另一個「愛國者」、港區全國人大代表馬逢國仲話，擁有回鄉證並非必然權利。
嗱，馬逢國今次就冇錯啦，因為《壹》仔睇番由中聯辦引述大陸公安部網站嘅資料，原來有三種情況係會不獲簽發「港澳居民來往內地通行證」，當中包括「被認為有可能進行搶劫、盜竊、販毒等犯罪活動」、「編造情況，提交假證明」，最後一種原來係「精神病患者」。即係話，精神病患者就算想愛國，國家其實係唔愛你囉！
香港有《殘疾歧視條例》，但似乎對大陸呢個擺明歧視嘅行為就無符，因為回鄉證雖然係由中旅社受理代辦，但審批權始終喺廣東省公安廳手上，香港法例管佢唔到。但係咁，中國其實早喺九○年已經正式通過《中華人民共和國殘疾人保障法》，不過廣東省公安廳咁多年一直當法例冇到，依法治國，咪又係得個講字。
撰文：巫不言
|
鍾意就快D Share啦！
|
|
|