探熱針
學友開騷 老婆羅美薇獨自夜行
四年冇响香港開演唱會，由北京唱到返主場香港的張學友，表現大勇，頭場自己俾 80分：「仲有啲嘢要執吓！」個唱有學友媽在後台打點，老婆羅美薇並未現身。
同學友一樣 fit爆的羅美薇，一向有運動習慣，除咗跑步，晚飯後亦習慣外出散步，一行兩粒鐘， 50歲的 May May腳力好，個樣亦 keep得好。
勁跳冇留力
在內地巡唱了十八場後，張學友終於巡到返香港，週日（十二月四日）開騷，開場第二首歌已經同二十三個 dancers一齊勁跳，冇留力！
唱接近三個鐘，換了十多廿套衫的學友唱了不少經典歌，《每天愛你多一些》、《情已逝》、《離開以後》、《吻別》、《餓狼傳說》，大大滿足歌迷。
向來要求高的學友，演唱會無論舞台、燈光、音響、樂隊都屬於頂班，唱《時間有淚》時，用燈光造成雨絲效果，十分吸睛。
同陳太唔啱 key
原本去年已經計劃舉行 30周年世界巡唱，卻因同陳淑芬反枱而節外生枝。
「學友對自己要求好高，開騷每樣嘢都要做到最好，但陳太要賺到盡，製作費高就不斷加票價，上次『 1/2世紀』演唱會， VIP飛要二千幾蚊一張，學友覺得長此以往好有問題，佢同陳太大家各有諗法，已經合作唔到。」知情者說。
今次主辦單位換了合作多年的環球唱片，學友坦言：「製作上幾乎我要求啲乜，佢哋都做到晒！」演唱會製作費驚人，但學友表示歌酬是有增無減，亦未試過在演唱會換咁多衫，身形長年 fit爆，學友說全靠打網球，「其實今次都冇乜減磅！」
日日做運動
首場演唱會，卻未見太太羅美薇蒲頭。「佢唔係今晚嚟睇！」學友說。
羅美薇唔會晚晚到場，但講到做運動， May May持之以恒，有時飯後亦會外出散步，一星期起碼行兩、三晚。
上月底， May May食完晚飯又出動，著住運動裝的她，步履輕盈行得極快，由淺水灣行去深水灣，來回行了兩次，不時邊行邊睇手機的她，留意住心跳脈搏。
回程路段， May May仍沒半點疲態，步速亦保持冇變慢， 50歲，無論身形樣貌，羅美薇同以前都冇大分別！
撰文、攝影、攝錄：娛樂組
|
鍾意就快D Share啦！
|
|
|