熱爆娛樂: 阿媽生日　大少郭炳湘 no comment [壹週刊 - 1396

2016年12月8日星期四

阿媽生日　大少郭炳湘 no comment [壹週刊 - 1396 - 財經] __,郭炳湘,M1,

中環人語

阿媽生日　大少郭炳湘 no comment

新地郭老太鄺肖卿上週五在她的「飯堂」 ICC天龍軒搞生日會，筵開廿圍，以為三兄弟郭炳湘、郭炳江及郭炳聯冰釋前嫌，大團圓齊齊同「阿媽」慶生，此乃美麗的誤會；當晚新地公關的 WhatsApp新聞稿已露玄機，只提及郭炳江、郭炳聯及不少部門經理齊齊出席；咁即係三缺一，郭炳湘無份參與？

但新地公關意謂郭炳湘並非新地董事，未能代他發布消息云云，只是不斷強調郭老太好高興；咁，其實阿媽生日屬家族嘅事抑或新地嘅事呢？還是直接向大少郭炳湘查詢，他回覆：「關於私人嘅活動，我唔評論。」郭炳江證實當晚大哥因事未有出席阿媽生日派對，又係嘅，席上除咗親戚，仲有新地經理級職員，見到大郭生點應對好呢？郭炳湘甩底，唔使難為員工之餘，更加唔使同細佬撞口撞面。

郭老太每逢過時過節，都喜歡與家人到天龍軒吃飯。

新地透過 WhatsApp發布的新聞稿，只有兩兄弟出席生日會，三缺一。

郭炳江得咗

曾經滿頭白髮的新地前聯席主席郭炳江出席母親生日派對前，特意到四季酒店「裝身」扮𡃁仔，最緊要嘅梗係個髮型啦，據知四季酒店六樓有間 QG Private i Salon，剪髮造型八百八十蚊起至千五蚊，視乎師傅經驗，要好似郭炳江咁立即變黑，要成兩千銀，富豪裝身都唔想俾人𥄫到，此 salon勝在有「私家房」，係咁意加多二百五十蚊啫！

出席阿媽生日會前，郭炳江出現在四季酒店，原來要恤番個靚髮。

四季酒店唔似文華酒店有理髮廳，但六樓有間 QG Private i Salon。

中環寸嘴　叫邱德根復活主持迪士尼

我都早着先機，生日會搵咗 model扮 Frozen入面嘅 Elsa，呢啲叫先飲頭啖湯。

禮拜日去咗小西灣睇狗騷（警犬技能比賽），令我諗起香港啲官正一門口狗，政府家陣話要使五十八億擴建迪士尼，號稱要添置兩個全世界未有嘅 attractions—— Frozen同埋 Marvel，兼要擴建埋睡公主城堡。香港啲官唔識同美國佬周旋，守唔到頭關，迪士尼搵你香港嚟「[!8AD8]價」咋， build up咗個價再喺上海、日本複製 Frozen或者 Marvel，咁個價咪唔低得過香港囉，到時累埋下家，啲官淨係識喺我哋納稅人面前狐假虎威，你估佢學得李小龍咁砌低洋鬼子咩？到時累民、累港、累國！

唉！家陣仲沿用十幾廿年前老懵董嘅 terms同迪士尼傾，好似割讓咗美租界咁，初初嘅定位已經衰咗，係全世界最細嘅迪士尼，四個 attractions都係舊貨色，尤其嗰個唯一唔使排隊咖啡杯，咁就闔家坐喺度轉吓轉吓，呢啲幾廿年前邱德根嘅荔園老翻都做到啦，咁不如叫邱德根翻生主持迪士尼好過。迪士尼都蝕緊錢㗎，你估佢有面咩？計我話，直頭要冚佢旗，叫佢自己困獸鬥，𠝹佢牌，邪一邪佢，然後洗牌重新再講條件，唔係俾人鍊住條頸斬到一頸血，唔係我招積，我真真正正喺番邦搵過真銀，絕對有資格開班授徒，不過學生有冇「吉士」跟得到我就唔知！

楊國佳

工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。

波叔炒古宅有水位

波叔（鄧成波）繼炒鋪、炒活化工廈，上週殺入元朗炒「鬼屋」，以六千三百萬買入七十五年歷史的「筱廬」，據知持有筱廬的陳氏後人，最近從多倫多返港，順便做埋呢單大買賣；呢幅地早前被政府規劃為 GIC地，即政府機構或社區用途，要轉住宅或商業用途都要有啲後台先掂，今鋪要睇吓佢嘅功力。但以此價掃入逾兩萬呎馬路邊地皮，都有唔少水位，事關「筱廬」這宗買賣涉及四幅地，只有一幅涉及住宅物業，其餘三幅即可免繳 15%額外印花稅。

筱廬原業主陳慕青為梅縣客家人，早年到印尼謀生，做火柴及貿易生意，經常香港、印尼兩邊走，二十年代選擇在元朗買入大量農地，日治時代，「筱廬」曾遭日軍佔用，至四九年印尼政治不穩，陳氏返回香港，族長陳慕青於五十年代離世；其後人散落多倫多、溫哥華及三藩市等地；陳氏重視教育，亦沒有傳統思想包袱，其女兒陳桂珍曾任拔萃小學校長；陳氏訂立遺囑時表示，即使是女兒亦有田有地分。