「嬲到震，蝦女人」邊個咁好火………之唔係化身「篋神」嘅李蘊，佢同啲的士大佬好有「緣」，上年先試過拖着行李篋坐的士過海，冇將細嘅行李篋放喺車尾，下車被的士司機加收$25，包括一程過海隧道費及5蚊行李附加費，事後李蘊喺Instagram貼出司機個人資料，為五蚊嬲爆對方影響香港聲譽(新聞連結：http://bit.ly/2gncvoY)。咁點知事隔一年，又再「開拖」喇...呢次又係因為5蚊行李附加費噃!之不過今次李蘊做足「功課」！李蘊今日喺Ig貼出一張身在的士車廂嘅相，留言：「嬲到震!蝦女人!」打上hashtag「香港的士」、「濫收車資」，其後再喺facebook寫道：「返香港搭的士又遇着衰司機，又關於車廂內行李收費，唉!點解啲人明知自己做錯仲諸多藉口㗎？話自己冇濫收，俾我揭穿後仲唔認濫收，但又唔敢收，姐(即)係點？你認為自己冇錯咪堅持囉，係咪啊？阿叔！仲話錄晒音，你咪拎出嚟俾人評吓理囉！好耐冇咁慶(㷫)！激死我」《蘋果》問過李蘊，佢就話同囡囡去旺角打針，跟住坐的士：「我唔係喺機場，頭先同BB喺旺角打完針，因為我喺廣州返嚟，好多BB衫要拎，所以我拎住個行李，跟住去第二個地方，去一個比較遠嘅地方。」李蘊就話自己嘅行李係一件size上到飛機嘅手提行李，李蘊覺得佢冇權收費，叫的士司機拎把尺度下，佢仲話：「的士司機就話我邊有尺，我就叫佢問吓行家應唔應該收，佢就話我話要收就要收，我話總之唔可以收，我拎住呢個篋搭咁多次的士都冇人收，同埋我已經上網check過係唔需要畀行李費，佢咁做即係濫收車資。因為上次已經衰過一次，同一樣行李，長闊高加埋係唔超過佢個(限制)厘米係唔需要收費，佢係冇權收嘅。」根據運輸署規定，的士過紅隧收費係十蚊，乘客要俾埋十蚊回程費，即係夾埋廿蚊；至於行李，每件擺放在車廂內而長、闊、高總和超過140厘米嘅行李，係需要收五蚊行李費。
|
鍾意就快D Share啦！
|
|
|