新劇入雪櫃改行做主持 江美儀鬧拍檔譏魚販犯眾憎
已屆45歲的烈女江美儀最近連環爆是非，有傳她篤走無綫高層曾勵珍愛將監製關永忠，珍姐一怒之下，將她由女主角打回原形變配角，擔正的新劇更無限期放入雪櫃。據聞江美儀向珍姐對家余詠珊投誠，但拍攝綜藝節目《街市遊樂團》時，又因經常鬧顧紀筠囝囝陳浚霆及貶低魚販，遭師奶網民圍插，她昨日出席活動時自辯說：「係角色設定，亦證明我好戲！」
■江美儀昨日出席活動時回應被指不尊重拍檔及魚販是角色設定。
【辱魚販】■江美儀（左）一邊剝蝦殼，一邊說曬蝦乾工作是自甘墮落，被網民插說話難聽過粗口。電視圖片
【踩新人】■江美儀（右）在節目中鬧顧紀筠兒子Andrew（左），指他是「富二代，冇嘢叻」。電視圖片
■江美儀在新劇《親親我好媽》首次擔正做女一，傳向高層篤走監製關永忠。資料圖片
江美儀最近猶如「烈火奶奶」上身，周圍辣火頭，先後向無綫新劇《親親我好媽》監製關永忠和舞台劇《嬉春酒店》監製朱仲銘開火。由亞視過檔無綫的江美儀，早前終於等到機會在《親》劇擔正做女一，但有指她對劇本諸多不滿，趁戲劇製作總監曾勵珍放大假時，單人匹馬向當時仍是助理總經理的杜之克，越級投訴珍姐下屬的《親》劇監製關永忠。結果劇集臨時煞停四日大執劇本，而在無綫任職三十年的關永忠就要「孭鑊」執包袱走人。
■顧紀筠認寵兒子Andrew，笑言要多謝美儀幫她教仔。互聯網圖片
■KellyJackie（後排左）昨表示有去過澳門探陀B吳若希，更逼對方進食。
「𠵱家個個識佢」據知此舉令珍姐震怒，即時將她擔正的《親》劇無限期放入雪櫃，在新劇《同盟》又淪為大配角。近日「坐冷板」的江美儀棄珍姐，投誠對家余詠珊，與麥長青、滕麗名和顧紀筠兒子陳浚霆（Andrew）拍綜藝節目《街市遊樂團》。節目出街後，有師奶網民插她獨有的老牛沙啞聲，一開口煩厭兼勞嘈；但更多人指她恃老賣老，狂鬧做「下把位」的陳浚霆是「富二代，冇嘢叻」，令對方尷尬。大前晚播出的一集，江美儀更指魚檔劏魚「每日賺嗰260蚊一斤」，又說「剝蝦曬蝦乾真係自甘墮落」，被網民鬧爆她刻薄兼看低人。
江美儀昨日在觀塘拍攝香港學生輔導會親善大使海報，明顯有備而來說：「都唔係咁大件事箒，自己平常心，係啲人拉埋啲嘢嚟講。」對於節目中狂鬧Andrew，她解釋說：「其實呢個係節目嘅風格，係角色設定，Andrew係下把位，俾我哋恰，俾我哋話，係設定嘅效果。」是否硬食做衰人？她說：「證明多人睇，亦證明我好戲！其實我哋幾個都好錫Andrew，佢又好有禮貌，好尊重人。我都幫咗佢㗎，𠵱家個個都識佢啦。」
被指貶低工人階級，江美儀又解釋說：「我唔係話佢哋，係話我哋幾個大食懶，如果我真係話佢哋，嗰啲檔口就唔會咁開心歡迎我哋去拍啦。」她又澄清與珍姐和關永忠關係不變，但承認有與杜之克傾過，她說：「第一次做女主角，人哋做女主角好順利，但自己就好似唔係咁開心，好擔心影響到人，但我冇帶隊上去投訴。杜生有問我拍成點，咁我當時叫佢放心，我哋會做好本身，但收唔收得唔係我哋控制。」
顧紀筠：惡惡地對於囝囝Andrew經常被鬧，顧紀筠認為「惡惡地」是美儀的風格，她前日在電話中說：「我平時唔會打唔會鬧Andrew，都多謝美儀幫我教吓個仔，鬧佢都係想袋錢入佢袋箒！」Andrew亦覺得自己有時說話未經大腦，他笑稱：「美儀係錫住嚟鬧，可能自己有啲被虐狂。」據悉《街》將於下周拍第二輯，由於角色設定，江美儀又可能成為箭靶！
採訪：舒娜、王梓嫚、黃曉妍
攝影﹕葉君海
|
鍾意就快D Share啦！
|
|
|