現年35歲的Derek憑惡搞日本歌曲《PEN-PINEAPPLE-APPLE-PEN》（PPAP）而熱爆網絡，一夜之間由冇人識，變成炙手可熱的網絡紅人。其實初入行的Derek，試過零收入，他說：「參選完港男之後，幾個月冇工作，又唔敢自己接Job，試過成個月冇收入，唯有黐屋企。朋友好好，會搵我食飯，但我唔想黐餐，所以想夾番錢，朋友話唔使，佢哋令我好感動。」不過他坦承也有難堪的時候：「對我嚟講，比較難受同有挑戰性嘅時候，係同舊同學聚埋一齊，佢哋會話我就嚟買第二間屋，另一個又話換樓，一個想買跑車，我嗰下覺得『死啦，我仲同緊屋企人住』，自己有少少耿耿於懷，後來諗通咗就唔會唔開心。」
收入不穩畀家用有困難
相隔五年，Derek靠自己賺了人氣，但始終收入不高，仍要跟家人同住，還跟細佬同瞓碌架床。熱愛創作的他，經常要屈在下格床思考，他坦言連給家用也有困難：「可能嗰個月工作唔多，或者有時娛樂圈唔係每一個工作都有收入，有好多幫忙嘅活動。但屋企人好好，好支持我，佢哋都好諒解，嗰個月真係畀唔到好多家用，佢哋又唔會迫我，又唔會畀說話我聽，我爹哋媽咪係好難得㗎！因為我係慳家仔，如果我有1,000蚊收入，就會儲800蚊，自己使200蚊！」
感激吳業坤鼓勵與啟發
Derek更視吳業坤為偶像，原因是對方同樣捱足五年，證明屋邨出身也有出頭天，他說：「吳業坤對我好大啟發，佢入行五年，由做主持開始，佢入行時好想唱歌，但未有機會做歌手，但一路自己拍片儲粉絲，儲觀眾儲歌，對我嚟講係一個好大鼓勵！」他透露吳業坤曾私下勉勵他：「佢見到我肥咗，就影低我個肚，同我講『阿東，你幾時減肥呀？不如咁啦，每日畀自己跑二十分鐘步，跑一個月』。佢驚我低潮期自暴自棄，對我好大啟發。」
從未放棄演藝夢
雖然演藝事業並不穩定，但Derek從未想過放棄，相反任何工作機會也不放過。對於突然爆紅，問他可有吐氣揚眉的感覺？Derek謙虛表示：「我訪問過藝人，明白娛樂圈今日Ok，聽日可能會跌，所以我一啲都唔覺得自己爆紅！呢個係一個起步，雖然已經35歲，但係觀眾開始認識黃建東係邊個。」
曾憂慮年紀大跑輸
Derek曾說過在台慶愈企愈後排，因而感到氣餒，算是人生最迷茫的時期，他坦言當時好想做一啲嘢：「但冇機會，娛樂圈每日有新人出，側邊好多新過我嘅人行得前咗，見自己墜後咗，都好擔心！因為最大原因係我年紀唔細，呢個對我嚟講，係好大擔憂！好多新人得廿歲，啲人話喺TVB浸10年、8年，可能會畀人認識，但人哋廿歲，浸10年、8年都係28、30歲，咁我30歲先至入去，浸10年、8年已經40幾歲，自己成日有個計時鐘咁。」
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|