有獎攞係一件開心事，但如果連續13年拎同一個獎，又立晒同一個頒獎禮大獎，身不由己，唔去又唔得，去咗又俾人話阻住地球轉……咁樣樣，對一向努力求進步嘅祖兒嚟講，難免不公。一個當紅歌手身體力行開side track演唱會，更公開呼籲歌迷唔好幫趁黃牛，「我寧願開騷見到啲位吉咗，都唔想聽到有人話，炒貴幾百咁入場囉！」令人敬佩。當司儀宣佈祖兒第14次摘最優秀流行女歌手——其實係第13次，鏡頭影住台下眾歌手包括吳業坤、鄭俊弘、Supper Moment等人都木無表情，齋拍掌……祖兒其實都有啲尷尬…佢由後台步出，而非由台下上去拎獎。當時祖兒仲要為表情鎮定而解釋一番:「其實每一次攞呢個最優秀流行女歌手大獎，對我嚟講我嘅心情都係好開心同埋好興奮，只不過大家喺我面上嘅表情睇唔出，只不過係因為，咁多年嚟我累積咗一啲經驗，變得比較…鎮定少少。(尷尬笑)」「其實我心裡面仍然係好興奮，但係點解我可以……有一種看似鎮定嘅感覺，其實真係多得大家多年嚟俾好多機會我演出，俾好多掌聲支持我，所以我應承大家，喺未來日子裡面，都係嗰句，我會繼續努力，多謝大家，多謝今年所有幫我做音樂嘅團隊。我團隊好大0架，得Alex Fung咋!」笑了一笑，又特別感謝家人及歌迷支持。賽後祖兒同張敬軒一齊受訪，祖兒自言當時得知自己又拎優秀流行女歌手獎時，都嚇一跳:「下？真係0架？」又歎謂覺得自己「好老」，軒仔即插嘴道:「應該攞夠30年!」問祖兒可覺得自己冇對手？她謂:「咁又唔係。」又笑謂力薦軒仔嘅《降兩度》得獎。講到話今年好多得獎歌手未有出席，祖兒話唔係:「大家都好努力，其實今年都好齊整，Eason都有嚟。」今晚摘四獎嘅軒仔話原本只係諗住拎到兩個獎，估唔到最後竟然摘四個。但之前有傳軒仔係大贏家喎，軒仔話:「我冇諗過自己係大贏家，其實今晚最驚喜係銷量獎，因為實體唱片真係好難攞0架喇。上年全年只係出咗兩隻碟，銷量去唔到十萬，加埋三四萬左右。」至於有冇信心拎埋無綫勁歌金曲男歌手獎？佢話冇咁嘅期望。問軒仔係咪因為陳奕迅出番嚟攞獎，所以冇咗拎獎期望？佢話:「唔係，見到佢攞，自己都開心，仲開心過自己攞，不過有啲獎我係有愧於心嘅，好似男歌手咁，今年有進步空間。」至於祖兒上次喺叱咤爭啲幫軒仔拆祠堂，重提此事，祖兒笑唔停謂:「係呀，嗰度有個鉤0架嘛。」又笑言要將軒仔「連根拔起」，並謂事後有向軒仔致歉。再問祖兒係咪有心拆祠堂等對方可以爭女歌手？祖兒笑到唔識答，軒仔即謂:「咁仲好呀，唔使去泰國。」
|
鍾意就快D Share啦！
|
|
|