(新增回應)陳茵媺(Aimee)係圈中出名好生養，幫陳豪開枝散葉，3年生3個。13年誕下大仔梓燁，15年初誕下二仔浩鋒，去年4月更成功追女，誕下「小公主」凱婷(Camilla)，陳豪曾經好開心咁話﹕「有埋個女係上天圓滿我哋嘅人生！」不過，養頭家唔容易，陳豪近年劇接劇冇停手，元旦日都要開工。而照顧三個仔女重任就落咗係Aimee身上。今日有周刊報導，指元旦日Aimee同埋兩位工人姐姐，一個mark一個咁帶住三位小寶貝去尖沙嘴。兩個囝囝先由工人姐姐帶去返playgroup，而Aimee就全天候照顧小公主。Camilla個樣同媽咪十足餅印一樣，難怪Aimee會特別寵愛小公主，一直唔放心畀其他人照顧。當日Aimee聽到小公主喊，知道佢肚餓，就二話不說將車駛入商場停車場較偏僻位置，然後抱埋囡囡坐後座，拉埋一半車窗簾，俯身近20分鐘餵B。落車時仲忍唔住好肉緊咁錫咗囡囡一啖，真係冧到爆！之後，Aimee又要落車會合剛上完堂嘅囝囝，兩位工人姐姐一人抱一抱，而Aimee就繼續貼身侍候囡囡。其實Aimee特別緊張個女亦有跡可尋，有指早前Aimee半夜睇急症，都係因為湊女太辛苦，精神緊張搞到自己都病埋。而之前Aimee生完兩個囝囝之後都極速修身，但今次誕女，為餵人奶亦未有刻意keep fit，仲推咗唔少工作，睇怕要Aimee復出都要一等再等。被問幾時復出？Aimee今日以短訊回覆《蘋果》﹕「Soon! 」仲加個kiss kiss emoji。Aimee，等你等得好苦呀！
|
鍾意就快D Share啦！
|
|
|