李家鼎打得又煮得，《阿爺廚房》令他人氣急升，去街市買餸被狂集郵。
探熱針
頂替徒弟做節目爆紅 揭黃淑儀秘跟李家鼎學廚
大台節目《阿爺廚房》出街後， 71歲的李家鼎被揭是隱世廚神而爆紅，事實上，不少圈中人早知廚神存在，包括神枱級的黃淑儀，也是他的哎吔徒弟；李家鼎拍飲食節目，原來也是由她大力推薦。
一抱之緣
李家鼎放下硬漢形象，拎起鑊鏟，一樣有大師傅風範，實在跌爛唔少眼鏡！更估唔到的是，不論中國傳統文化，到博大精深的中華廚藝，他都甚有研究，連視界「廚神」黃淑儀，也是他的徒弟。
「 GiGi姐（黃淑儀）同鼎爺識咗好耐，七十年代拍《書劍恩仇錄》， GiGi姐做李沅芷，鼎爺就做言伯乾兼武指；當時 GiGi姐同做霍青桐嘅汪阿姐拍對打戲，阿姐一劍劈過嚟，插正佢左眼眉頭狂標血，鼎爺一手將 GiGi姐抱起，叫人飛車送去浸會醫院，之後兩個就開始熟絡。
「 GiGi姐知道鼎爺爸爸以前係酒樓老闆，訓練到佢都煮嘢好叻，好多年前就跟佢學廚，叫鼎爺做師父。鼎爺都有讚過 GiGi姐廚藝比佢好，但有好多下廚秘訣，其實都係鼎爺教嘅！」知情人說。
半信半疑
據了解，無綫原本邀請黃淑儀再拍飲食節目，但她沒有時間，於是大力推薦師傅李家鼎。
「 GiGi姐叫我哋搵鼎爺嗰陣，大家都以為佢講笑，但佢拍晒心口，話一定有驚喜，仲大讚鼎爺功力深厚。監製初時都半信半疑，直至同鼎爺傾過就知對方有料到，拍攝期間，鼎爺俾咗唔少意見，而家出街反應咁好，除咗鼎爺功勞，監製都要多謝 GiGi姐。」工作人員說。
嶺南校董父
表面是一個老粗，實際上，李家鼎是個正宗西關大少。祖父是廣州大商家，父親李卓雲是西關大地主兼酒樓老闆，同時也是廣州嶺南學校的校董，書香世代。走難來港後，家道開始中落，但大戶人家出身的李家鼎幼承庭訓，出口成文。
「鼎爺見識多，又鍾意幫人，之前張繼聰拍《收規華》，都有同佢請教舊時廣州啲俚語，話佢係圈中活字典，冇錯！」一名無綫人說。
排隊黐餐
八歲學廚，只為滿足嘴刁的父親，每次李父跟大廚研究完新菜式，就會回家叫鼎爺照做。因從不獲父親稱讚，令好勝的鼎爺不斷努力求突破，最終練成一手好廚藝；不過本身不喜歡在廚房工作的他，七十年代獲師兄邀到澳洲為領事做廚師，鼎爺也一口拒絕。
李家鼎的廚藝譽滿圈中，節目出街後，更加有不少圈中人想排隊去鼎爺屋企黐餐；連去街市買餸，都被師奶圍住問「功課」，廚神之外，還稱得上是「爺神」！
估佢唔到
71歲的李家鼎最近被發現是烹飪高手外，其實還有唔少「估佢唔到」的事，教過蒙嘉慧、陳慧琳、江若琳馬術的他，更在比賽攞超過二百多個獎，好威水。
撰文、攝影、攝錄：娛樂組
|
鍾意就快D Share啦！
|
|
|