無綫處境劇《愛．回家之八時入席》喺聽日播完最後一集終於散席。不過《愛·回家》系列就點會咁易散席？嚟緊8點檔，將會播李添勝套告別作《財神駕到》，之後，新一輪嘅《愛·回家》又嚟啦，到時又可以~~晚晚陪住你食飯！有傳嚟緊處境劇個名叫《愛．回家之開心速遞》，將會喺2月尾推出，人選方面，日前有傳媒問監製羅鎮岳，佢就賣晒關子話會新人加舊人都有，今日試造型嗰陣就會知道，有指丹爺劉丹一定走唔甩，湯盈盈都好大機會留低，新人就會加入呂慧儀等。不過咁，講咁耐大家最關心睇怕係「馬家」成員究竟有冇份，始終對得耐感情都好啲。可惜有傳媒之前問過徐榮同蔣家旻，佢哋話有劇喺身，似乎想「馬家」齊齊整整，應該都幾難！但係據知喺即將開拍嘅處境劇，唔算係《愛·回家》嘅延續故事，係個新嘅故仔，丹爺都唔係做番之前個角色。雖然佢哋未必有機會再聚埋拍劇，不過話晒拍劇嗰陣日對夜對，劇中演員感情幾乎好似家人咁close，平時都會約出嚟一齊聚會吓。前日見到「馬家」全家人包括丹爺、黎諾懿、林漪娸、蔣家旻、徐榮、羅天宇等馬家成員現身將軍澳新都城。眾人邊行邊有講有笑，儼如一家人一樣。講到「馬家」日前去將軍澳食飯，黎諾懿回覆傳媒話：「平時我哋會約食飯，不過呢次就係以『馬家』身份一齊做節目，形式類似之前《一屋老友記》去台灣做節目，今次就係我哋以『馬家』身份去捐窿捐罅去搵香港嘅好嘢食！」而當日有現身嘅林漪娸，亦回覆傳媒話：「其實我哋『馬家』過時過節都會出嚟聚吓，今次就係做節目，如果有機會再一齊拍劇就梗係好」
|
鍾意就快D Share啦！
|
|
|