人生有幾多個十年，十年人事幾翻新？現年29歲嘅江若琳過去十年，由少女追尋夢想加入娛樂圈，歌影視三線發展，寂寂無聞捱出頭，2013年仲憑電影《高舉．愛》角逐第32屆香港電影金像獎影后，可是2014年就爆出跟前經理人公司寰宇藝人管理有限公司有合約糾紛，江若琳自爆過去10年死約期間零收入，但2014年死約結束，但寰宇老闆林小明指江若琳當年簽約15年，其餘5年由公司決定續約與否，佢冇權解約，合約糾紛對簿公堂。至今搞足兩年多仍冇結果，為咗攞個公道，江若琳孭下大筆律師費，過去兩年北上賺人仔，但佢為紀念今年入行十周年，決意回歸。江若琳由零開始，離開寰宇，身邊冇錢冇助手，慶幸有閨密不離不棄，兩個女人打江山，江若琳日前接受《蘋果》專訪時話人仔唔易賺：「我間公司好龐大，得兩個人，我冇後台、冇勢力，得兩個女仔，社會上工作講勢力講關係，有時有啲導演會話，角色其實好想用我，但其他人公司較優勝。」機會就咁流失，江若琳氣餒，佢想到早年有公司遮蔭：「我唔出去應酬，唔賣笑，去到飯局，我會撳住電話，越縮越埋去角落，以前經理人成日話湊住我好辛苦。今時今日仲有嘢做，嗰啲人真係欣賞我。」江若琳北上兩年拍了十部電影，全憑口碑繼續有得撈，佢話：「合約官司持續進行中，踏入第三年仲處理緊，涉及法律部份唔方便透露，等香港法律定奪。」呢場持久戰，對十年零收入嘅江若琳曾帶嚟精神折磨，一度患上抑鬱症，當然金錢壓力也大：「我計過條數，每月一定要跑6位數字，我先可以正常生活，我要畀龐大律師費同養家。」為咗跑數，江若琳不停諗計，佢趁拍戲空檔攝登台填數：「一收工搭幾個鐘機，再搭車，去到唱兩首歌，唱完又搭返車同轉機返去劇組開工，冇瞓過再埋位。在我嚟講唔辛苦，犧牲咗瞓覺時間，但我可以搞掂條數。」獨在異鄉成異客，江若琳每夜都思親：「感覺好孤獨，食同住冇屋企好，有時去到每個城巿，唔知自己喺邊度，拍戲收工返去對住四堵牆，收工冇人傾偈，冇人煲湯。不過只要有工開，人就有安全感，壓力低好多，好過喺香港瞓覺愁呢個月費用，所以環境雖然辛苦，但心中快樂。」江若琳相信絕處逢生，天無絕人之路，呢啲經歷卻為佢上咗人生寶貴一課：「我o依家變得睇每件事都雲淡風輕，好懂得去快樂，十年經歷變成我嘅正能量。」硬頸令江若琳今日仍䇄立不倒，行到呢步佢最感激父母：「我被人貼街招，媽咪爹哋趁我出街時去街搣咗，我後嚟先知呢件事，但被冤枉同侮辱係最難受。」江若琳又試過去食麵，遭店員兜口兜面批評，佢話：「我到o依家唔放棄，堅持留低，我要用自己努力證明大家係睇錯，向不公平低頭，就代表我默認一切，我唔可以認輸，父母當日搣街招都好委屈。」江若琳爭氣留低，佢話今年會推出一張廣東碟，紀念入行十年，仲會朝住導演路邁進。江若琳簡單形容呢十年好似坐刺激嘅過山車：「未望到高處，我就落咗低谷，我要多謝畀我唔同故事嘅人，佢哋成就到今日嘅我。」換句話說江若琳都要多謝對簿公堂嘅寰宇老闆林小明：「呢十年佢畀我好多機會，對佢唔會有任何仇恨，我哋只係合約同金錢糾紛。」即使將來公開場合碰上，江若琳話不會迴避同尷尬。攝影：沈健程
髮型：Kel Fung of HH Hair
場地：Bistronomique
|
鍾意就快D Share啦！
|
|
|
