今晚華姐競選賽果有少少意外，外界一直睇好嘅冠軍大熱門──5號佳麗林宣妤最後只得亞軍，相信有唔少人跌咗眼鏡。
其實林宣妤未能奪冠真係令人好意外，話晒今屆競選移師馬來西亞雲頂舉行，佢身為吉隆坡代表，絕對有主場之利，好似早前嘅才藝前哨戰，現場觀眾已經一人一票投選佢拎「馬來西亞風情大獎」。
被譽為零死角美女嘅林宣妤，齋講外表又真係冇得輸嘅，佢的確係人靚聲甜，典型大眼美女、肌膚白裡透紅、 副body又夠修長纖細， 仲有一把飄逸秀髮，好有仙氣，某啲角度睇，仲有幾分似Angelababy添，不知幾多人buy！就算佢唔化妝，都依然係美人胚子，只係眼袋大咗少少。
可惜，人哋已經名花有主喇，有個叫Norman嘅有錢男友，啱啱新換畫架咋，事關佢喺上年十月選Astro國際華裔小姐競選2016之前嘅男友係呢位， 選完拎埋冠軍出咗名，男友就換成有米Norman。
Anyway，選華姐齋講樣係唔夠，才藝同大方得體都好重要。喺表演方面，林宣妤不過不失， 但問答嘅內容就見人見智，事關佢喺台上強調自己有主場地利優勢，感覺唔夠謙，而且一句「粉身碎骨」又明抽陳凱琳水，唔夠得體， 所以最後屈居亞軍，未必無關。
來源 source: http://s.nextmedia.com
|
鍾意就快D Share啦！
|
|
|
