韓國天團BIGBANG今日於香港啟德郵輪碼頭舉行首個戶外騷，不過就因為安排過於混亂，引起現場粉絲極度不滿。本報記者親身經歷，原先大會沿用韓國入場模式、安排所有粉絲跟住號碼排隊入場，但現場不少fans都唔係跟號碼次序排，導致粉絲迫埋一堆。警方隨後話唔再跟號碼入，改為分批入，結果越搞越亂。開騷前半小時，喺九龍灣德福花園仍然有成500觀眾排隊等候86號綠色專線小巴，當中估計要等1個鐘先可以成功上車，再加埋塞車、入場check bag過三關程序，即係話分分鐘個騷完咗都未去到會場，咁仲唔係會惹成災難？距開騷前一小時，入場門口被分成左右兩邊。排喺左邊嘅係乘坐第一班車／船到場嘅粉絲，包括市民林小姐在內，佢哋約1點半抵達現場後，大會就安排佢哋到啟德碼頭後面嘅一片空地等，當時亦未見門口有人排隊等入場。該批粉絲等到兩三點左右，大會就安排佢哋返番去門口等入場，但去到門口，就發現多咗喺右邊排隊嘅粉絲，明顯右邊嘅粉絲係比較遲到達會場，而林小姐在內嘅該批粉絲就被安排排喺左邊等入場。不過警方稱唔再跟號碼入場、改為分批入嘅時候，突然就有一批自稱手持80幾號門票嘅粉絲話想入先，再度引起排緊隊嘅粉絲不滿，再次引起鼓譟。警方安排亦一時一樣，令人無所適從，一時就放右邊嘅粉絲入場(即遲嚟嗰班)，令排喺左邊、包括林小姐在內嘅粉絲極度不滿，事關佢哋為排隊入場連偶像嘅周邊商品都冇買到，而右邊嘅粉絲就買完先再去排隊，反而比佢哋早入場。林小姐表示，佢手持600幾號飛，按原先嘅指引，應該係晏畫兩點半就要排隊輪候入場，不過林小姐稱自己一點半到達現場，排隊等咗近3小時，但警察卻放其他人入場先，自是不滿。約4點半，排喺左邊嘅粉絲先全部入場，足足等咗3個鐘！亦有現場排隊嘅觀眾向本報投訴，佢book咗兩點車，點知塞車塞到三點先到，排隊時又唔可以離開，一離開又要喺龍尾再排過，點知排隊條龍又同買周邊商品嘅人龍好接近，搞到兩條龍混埋一埋，非常混亂。
| 攝影：陳海威 | | |
| | | |
| | | |
| |
|
鍾意就快D Share啦！
|
|
|