「你覺得自己依家幸福嗎？」「幸福0架，咁當然會有唔開心嘅時候，話冇就呃你嘅。但係我覺得，到我呢一刻做人，我覺得我係幸福嘅。」上月26日，吳婉芳接受好友梁佩瑚節目《佩瑚密語》任嘉賓時，這樣說。沒想到昨日卻驚傳吳婉芳丈夫胡家驊猝逝的消息。整個訪問長逾一小時，吳婉芳無所不談，由扮靚之道、子女教育之法，以至學佛感悟細細道來。訪問尾聲，梁佩瑚突然問這位相交數十載的好姊妹對生活的感受，吳婉芳就說:「我覺得一個人若果知足，就一定會幸福，你依家要我再揀，我好唔開心我冇嗰把鬈頭髮(吳婉芳謂最想就是有一把野性鬈髮)，咁我就真係唔開心呀？咁我真係可以好唔開心0架喎！你明唔明我講咩呀？」「每一個人都要知足常樂，咁就一定開心嘅。可能有啲人話，生活係比較艱苦，但知足一定係常樂啩。最緊要健康。當你冇咗嘅時候，你就會珍惜有嘅時候。「我以前去塊面，成日都好油好油，我要不停拎吸汗紙去印。好喇，到依家五十歲喇，一滴油都冇喇，哈哈，跟住就喺度懷念喇：『多啲油就好』人就會係咁。當你冇嘅時候就想要，所以我覺得要知足常樂。一滴兩滴（油），都要好好珍惜。」「健康真係好緊要，你真係唔知道，你隨時……就算呢一刻我同你講緊嘢，可能我下一刻已經走咗。人就係無常。你真係要珍惜每一刻，邊個喺你側邊。就算嗰個人激你嘅，但佢都仲激緊你。可能有一日瞓醒，佢已經冇得激你，咁你就會諗：『唔該你激我』所以我覺得，好與唔好，都要珍惜，都係一個生活體驗，一個人成長需要面對嘅嘢。「唔係因為我生活安定，而講啲咁嘅說話，我知道一定好多人咁講。我自己都試過低潮、唔開心，但…始終，你諗番轉頭，你仲有爸爸媽媽、朋友喺身邊支持你，你起碼仲有一口氣同人講，你起碼仲有感覺，你會知道，而唔係瞓喺張床度，完全冇晒感覺。你有感覺但你講唔到，我覺得仲慘。「今生做好啲啦，希望下一世唔使捱苦。」
|
鍾意就快D Share啦！
|
|
|