她身旁的心頭好，是 Harley Davidson的 Softail Slim Special，$280,800。
名人動態
烈女辣車 Mark嫂 Jade
Mark嫂阿 Jade（梁家玉），絕非柔弱小家碧玉；出名煮得一手好菜的她，更是一名辣車手，加上性格率正，正宗烈女。
三歲定八十！阿 Jade在食譜的序自述在陽氣盛的家庭長大，玩伴是哥哥和弟弟，玩具是刀刀槍槍和車車；小時見舅父有部 PGM電單車，從此種下烈火戰車情緣。
老婆愛揸辣車，雷頌德自認執到寶。
當雷頌德遇上辣妹
二十歲考電單車牌，意外是老媽子未有反對，任由掌上明珠「皮包鐵」。
「因為媽咪唔阻止，反而令我學會做事有分寸，就算係青少年期，我都冇反叛呢樣嘢。」 Mark嫂 Jade說。
烈女性格，毫無性格的綿羊仔自然看不上眼；更何況她的另一半雷頌德，初出道已經揸住私伙「玩具」 Harley Davidson一晒。兩公婆嗜好相投，當日颷車男首度遇上颷車女，反應是？
「佢覺得執到寶㗎，哈哈！要搵到女人揸電單車幾難呀，仲要揸呢類！當時成班車隊，得我一個女仔，其他經過司機都會望一望。冇乜女仔揸到呢隻咁重型嘅車，我都要專登去操同玩舉重。我好大力㗎，同男仔打交未必輸。」雖然身形瘦削，但 Jade絕對唔講得笑！
為小朋友學錫身
婚前婚後，兩人的活動是孖住颷車。不過，二人從未有過《天若有情》的浪漫場景，坐車尾， Mark嫂 never say yes！
「我一定唔坐人車尾！就算冇得揀坐過老公車尾，原因係佢載我去攞番架整好嘅車。其實坐車尾好危險，每個人對突發事情反應唔一樣，我對自己嘅駕駛技術同反應都好放心，但信唔過其他人。」
不過，自從成為人母，烈女 Jade便自動減辣。
「自認技術唔差，但始終有小朋友，要錫身，天氣唔好或者精神唔夠一定唔揸。真係今時不同往日！以前唔理咩天氣落晒雨都照去，唔驚死！好在未試過有意外。」
老公重開綠燈
阿 Jade雖然懂得自動自覺，但雷頌德亦不敢怠慢，落令禁止老婆再揸電單車。
「生咗大仔後，老公曾經反對我再揸電單車。但我唔想因為咁，將自己喜歡嘅興趣埋沒，其實最緊要揸得安全，況且我性格唔魯莽。」 Mark嫂最終用實力說服老公，重開綠燈。不過，每次老婆出車，雷頌德一定跟，以防萬一！
撰文：盧韻琴
攝影：葉志明
攝錄：黎以諾
化妝： Krisie Wong
髮型： Kavi@Fifth Hair Salon
服裝及場地提供： Harley Davidson
|
鍾意就快D Share啦！
|
|
|