豪語錄
真城寨英雄 羅莽
自信的男人最性感，唔信你睇羅莽師傅。邵氏年代，邊個打星身材最正？「想謙虛都唔得，梗係我；講番呢個年代，想謙虛都唔得，又梗係我。」羅莽唔同羅仲謙，練波不靠器械，每寸肌肉都是真功夫。「到年紀大咗仲玩啞鈴，點講呢……好似苦力咁啦。功夫係一種技巧。」
他自小拜東江朱家門下，是南螳螂好手，現時仍經常跑上飛鵝山練功。千錘百煉，非尺寸所能量度，「丁不丁，八不八，手從心口發，有橋橋上過，冇橋自造橋。都好辛苦㗎。」螳螂拳的基本步法，是弓背、深蹲、腰腹坐落，「師兄弟咁樣對猜幾個鐘，乜脂肪都冇晒啦。兩臂夾住，已經好有肌肉。膊頭、胸肌、腹肌，冚喺晒度。
羅莽生於九龍城寨。三山五嶽，能戰才能和。身為家中大哥，父親叫他去學兩招來保家。後來憑八腹肌獲張徹導演青睞。作為真正的城寨英雄，他在大台劇集《城寨英雄》也有角色。編劇可有找你攞料？「咁又唔清楚。公司咁大、部門架構……可能佢唔需要呢。」導演可有來請教兩招？「因為我係 artiste，不在其位……」結果他又再演「一秒強姦犯」。
捱打
羅莽耍出幾招螳螂拳，拳風虎虎，攝影師不由得退避三舍。拍攝既畢，雙方都氣喘吁吁。他今年六十三歲，體能比起年輕時也許稍有不及。《城寨英雄》的動作場面獲好評，大台禮聘張徹另一名弟子、與羅莽同期出道的郭追任武術指導，卻遺忘高手就在身邊，「《 TVB週刊》曾經訪問我，應該知我係城寨居民；知道我學功夫，係為咗要保護啲細佬。城寨以前係『三不管』，連警察都唔敢入嚟。」
有一回，比他年幼十歲的弟弟放學回家，被飛仔攔路，要找大哥幫拖，「去到我話：打啦，我係師傅。佢哋一見到我，係咁意都打咗兩招。哈哈……」講起威水往事，他格外精神抖擻。可惜四十歲以下的觀眾只記得他扮女人、扮不諳武術的吳剛、以至辣手開苞的強姦犯，「感覺上…… hard feeling係冇嘅。都係睇公司點安排。我唔抗拒，亦冇得抗拒。」
羅莽也不為公仔箱所困。分別在《葉問》系列和《一代宗師》踢館，成為唯一與甄子丹和梁朝偉對決的師傅，「榮幸榮幸，人哋賞識先有咁多機會。」雖然被葉問 KO，是必然結果，「捱打總有。拍戲咁多年，承受力都預計得到，而家的武指都好有經驗。託賴咁多年都冇嚴重受傷。」上次見紅，是九一年拍無綫的電視電影《特技雙雄》（錢小豪、張衞健主演），導演要他由三樓跳下去。望見地面一堆紙箱，羅莽想搵替身，但公司不准。導演對他說：「唔使啦，羅師傅。我都跳到，你點會唔得？」「我嗰時仲後生，好勇，係個好認真嘅演員。」一躍而下，滿口鮮血，「撞落嚟，隻牙喺入面裂開咗。縫完針第二日又再拍過。」「特技唔係功夫。原來跳落嚟要卸力、個身要挨後。唔知點解個 stuntman冇講我知。」
早幾年，《打擂台》復刻功夫片，找梁小龍、陳觀泰出山，甩皮甩骨的師兄弟也要大打一場，惟羅莽穿一身 A貨名牌演收地惡霸，「有啲戲唔一定主角先好睇。有好多元素、高潮低潮，如果個個咁好打就唔好睇啦。」只怪他在大台的形象太洗腦，「打人嗰個有表情，被打嗰個，都一樣係用表情嚟演。因為拍戲始終係假嘅，唔係真打。如果你覺得咁樣唔夠威，就唔知咩係藝術啦。」他在新作《夠殭清道夫》也做師傅，只是捉殭屍的都成了公務員。除下道袍，穿上類似食環的熒光背心。
粉絲
香港觀眾忘了羅莽渾身肌肉的來由。在美國，卻有一班死忠，看邵氏功夫片長大。○七年，他獲美國 Phillywood Entertainment第一屆「國際武術影業終身成就獎」，由當年的賓夕法尼亞州州長頒發。去年有美國導演搞眾籌，希望復刻邵氏名作《金臂童》。由羅莽親自上陣，拍成短片《 Golden Arms Returns》。導演更為羅莽舉辦影迷聚會，「啲 fans好嚴肅，由各地坐飛機來等你。我一入到去，全部企晒起身、拍手，我都嚇一跳！哈哈哈……」
粉絲中有很多是黑人，逐一訴說美國鄉鎮的生活如何苦悶，如何被社會不公所壓迫，惟有靠功夫片慰寂寥，「佢哋睇到功夫片嘅俠義心腸，原來呢啲叫正義。我都好感動， fans真係咁厚愛我。有機會我真係要拍多啲功夫片，等佢哋欣賞。」有女粉絲把羅莽在《五毒》的造型紋在手臂，「美國有啲農村比較窮，家庭教育唔係咁好，父母有時會打佢哋，佢哋覺得唔公平。睇咗《金臂童》，就去練功夫、要反抗，所以而家咁大隻！」大隻佬講到激動處，一拳打在牆上。
又有人在墨西哥買了整個山頭起影城，準備拍功夫片，「係有羅斯福嘅邵氏影城！佢哋請咗我去奠基。」在堆填區附近的邵氏影城，卻長期賦閒。羅莽中學畢業後在張徹的電影公司做信差，只為等一個機會，「當時張導演同劉家良師傅意見不合，要另起爐灶。好多劉師傅的武師佢都唔用。咁啱拍《少林寺》，需要大量 stuntmen，所以就有『邵氏武術訓練班』，我係第一期。」
魯莽
《少林寺》群僧粥粥。開鏡前，羅莽人有三急，回來時發現其他人已列陣，「我好驚，聽講張導演鬧人好勁。心諗如果佢鬧我，我就走。」張徹大喝一聲：「返嚟！」隨即安排羅莽企前排，鏡頭 close up他的八嚿腹肌，再拉 wide，「所以我開始行運啦。」後來張徹為他改藝名，「我真名叫羅坤霖。佢老人家好細心，先問廣東話有冇問題。」「我又多口。羅羽咪即係落雨？廣東話即係落雨收柴喎。」張徹臉色一沉，羅莽逃之夭夭，卻被水管絆倒，「好呀，魯莽。就叫羅莽好了。」
若當年叫羅羽，可能會大紅大紫像王羽？「名其實唔重要。最緊要係你嘅條件、市場仲需唔需要你。」如今市場需要搞笑的羅莽，多過好打得的羅莽，「練到咁好打又如何呢？唔興嘛。」「當年啲師傅喺大陸落嚟，學功夫、做保鏢都係想搵錢。四、五點起身就練、打霧水。喺青苔上，除咗鞋，用腳趾抓住行過去、撻落嚟。邊個要練？」「如果真係要搏擊，真功夫埋門三幾下就搞掂。香港係法治地方，有咩事就報警啦，仲打？」
拜師
講起報警，羅莽出入官門的記錄可不少，全部因為酒精而起。○六年，他撞向停車場的石，卻拒絕接受酒精測試，被法庭罰款八千元；○八年，醉俠羅莽涉嫌強吻兩名男途人，被控在公眾地方行為不檢及襲擊公職人員。資深大狀駱應淦是功夫迷，在報章上看見偶像被押走，心中不忍，免費為他打官司，最終獲輕判罰款二千元了事。
駱應淦在法庭上卻道出他的身世：「硬橋硬馬的功夫片沒落，不擅長花拳繡腿的羅莽被迫轉型，加入電視界充當諧星。年紀大，面對如此景況，常借酒澆愁。」羅莽心裡苦，但羅莽不說，「前事不提。」現時仍不時有人影到他在食店獨自隊啤、自言自語再昏睡。
至於當年被不良分子恐嚇的弟弟，後來也成了大律師。羅志霖的師傅正是駱應淦，「我知道駱應鈞係佢大哥。聽細佬講，佢好想跟駱應淦，咁我就打俾阿鈞，我同佢好熟嘛。」當時駱應淦本來已不再收徒，但駱應鈞向羅莽誇下海口：「佢係你 fans喎，點解唔收？」結果兩位弟弟各自「被拜師」，「好多謝駱師傅，咁賞識我親細佬。」
撰文：蔡慧敏
攝影：黃志明
攝錄：葉志明
場地：香港九龍貝爾特酒店
|
鍾意就快D Share啦！
|
|
|