坦白講
「慈母」多敗兒
林占士，七十二歲，退休警司，曾任警隊內部紀律聆訊主審官，更曾在六七暴動前線抗擊左派人士。退休十幾年，但依然對服務三十載的警隊着緊，更因「七警案」走上街頭。但同行者的表現令他詫異，警隊高層的反應更令他大失所望。香港警察能否繼續做「頂天漢子」？
七七年，香港貪污成風，由救火到睇醫生都靠錢疏通。但嗰時打開報紙，只會見到呢個差人被拉、嗰個警官被查，好似成個社會都針對我哋咁，班手足梗係唔服。有日佢哋決定去警察遊樂會集會，要成立一個組織，團結起嚟。我冇去，因為我要留喺荃灣警署候命，如果有咩失控，變咗非法集會，就要我去處理。我同隊員講：「你哋一陣面對嘅，可能會係自己手足。」手掌係肉，手背都係肉，大家心情好凝重。好彩最後冇事。
估唔到，四十年後，同一地方，又有半隊警察集會。呢次我都冇去，唔係因為我怕事，只係唔想見到大家用錯方法幫同僚。
判嗰七位同事有罪，我相信冇咩人會非議，佢哋確係做錯。警察要保護其他人同自己，甚至乎保護嗰個人，當然有權使用武力。但我哋嘅宗旨同守則，就係目的一達，武力就要即刻停。唔可以採取報復性武力。
不過一判就兩年，我當差咁耐，好似未見過同一罪名判得咁重。法官話警察打人，而警察本身代表法律，要判得重，我唔反對；但如果係襲擊警察、「襲擊法律」嘅人呢？好似又輕判咗，實在難令我信服。所以判刑幾日後，我都要上街遊行，撐吓同僚。
現場唔少新、舊同事，但有部分人實在好唔理性，講晒粗口，話法官係狗，講好多唔文明嘅說話鬧司法制度。如果你俾個牌我話「天地有正氣」， OK，我覺得幾啱。但你俾啲「貓貓狗狗」我，我唔會揸，因為唔係我信嘅嘢。我信嘅係合理、合法咁執法。如果盲目咁支持，對雙方都唔好。
行過先發覺呢啲示威根本唔係我想像咁，所以幾日後個「會員大會」我都唔想再去。我只係關照吓班舊同事，同佢哋講：「我唔希望呢個集會變成爛仔聚會，講啲貶低自己警察嘅嘢。」結果出嚟，大家都有眼睇啦，確係有些少失望。
不過嗰班高層，先最令我失望，淨係一味話要支援班手足，從來都冇諗過要有教訓。好似個仔犯咗錯，老豆話得啦，唔使怕，我哋賠錢得喇，你冇事。咁咪縱壞佢囉。
以前喺灣仔當更，有個同事太俾心機去查案，走去「撩」嫌疑人信箱，被人睇到報警，拉返自己差館。我哋惟有落案控告。雖然手足們都有為佢私下籌錢，我仲幫佢搵律師。但幫之前我真係有摑佢兩巴，問佢點解咁蠢。
從錯誤中學習，呢點係一定要講，然後先幫佢，咁先係「恩威並施」。
撰文：關冠麒
攝影：李育明
news@nextdigital.com.hk
|
鍾意就快D Share啦！
|
|
|