名人旅遊
七億富婆唔亂使 兩孝女陪曹央雲貼地遊京都
擁有逾七億身家的富婆曹央雲，去年底爆出被生母多年來苛索無窮，甚至生命受威脅，一直獨自照顧兩女的她，早前終於走出陰霾，由大女 Audrey負責總指揮，安排貼地京都遊。全程由兩個孝順女帶住吃喝玩樂，曹央雲有番笑容。
用得其所
單親媽咪曹央雲，多年來生活以兩個女兒為重心，每逢學校長假期，她多會跟女兒出外旅遊，讓她們放眼世界增長見聞。一家三口早前遊京都和奈良，行程、膳食更由讀中一的長女 Audrey安排。
「央雲由細到大教兩個女應使則使，最緊要用得其所，好似喺餐廳叫食物，一定要食晒，唔可以浪費。大女讀三年班時，用咗兩年嘅書包，都堅持洗淨再用，唔買新書包開學，好樸素。 Audrey知道媽咪早排為咗屋企事唔開心，所以今次行程唔煩佢，事先上網搵定好多資料，由落機買飛搭子彈火車去酒店，每日食邊間餐廳，一個人搞掂晒， Audrey自理能力高，做得好妥當。 Promise（細女）有樣學樣，得六歲人仔乜都話自己做，幫手拎大行李。其實呢啲都係身教，央雲出名孝順，兩個女同婆婆、阿姨一家相處過，孝順都係喺媽咪身上學返嚟。」曹央雲身邊人說。
治療心情
京都之旅後，曹央雲在 facebook抒發心聲，指幽靜的京都是治療情緒好地方，住了幾天，對事物對人生都有不同看法，如跟兩個女兒晚上看煙花、或在路邊看師傅努力做草餅，都令她領略到生活簡單的快樂。
「 Audrey今次帶媽咪去食嘅嘢一啲都唔貴，好似百幾蚊嘅大盤魚生，只賣幾蚊嘅新鮮草餅，好地道。平日喺香港出入有司機接送，今次遊京都，三母女全程坐火車， Audrey好細心，會先睇地圖然後買車飛，等媽咪放心。 Promise鍾意動物，其中一日嘅節目，家姐就安排去公園餵鹿， Promise見到動物好興奮，唔捨得走。」曹央雲身邊朋友說。
文學家故居
為要體驗古時日本人生活，曹央雲提出入住京都的八千代日式酒店，她在 fb指酒店由江戶時代文學家上田秋成晚年故居改建而成，擁有不一般的文化氣息，兩個女兒在酒店內學穿和服、茶道。
「央雲中學讀書成績唔錯，因為要做嘢養家，所以冇機會讀大學，佢見兩個女讀書都叻，又經常攞獎，所以好用心栽培。佢成日話希望有個幸褔家庭，兩個女咁生性，佢都應該開心啦。」曹央雲身邊人透露。
撰文、攝影、攝錄：娛樂組
|
鍾意就快D Share啦！
|
|
|