六十八歲的李兆基染了紫紅色的頭髮，他說農曆新年前理髮師建議他這樣染，認為看落較精神爽利，效果如何見仁見智，李兆基兩年前輕微中風後，右邊身體乏力，加上積蓄花得七七八八，李兆基收埋自己，甚少與江湖和圈中人士聯絡，有媒體形容他窮困潦倒。
惡人不惡了，還有意思嗎？
他唯獨肯接觸的人，是當年他的大佬陳慎芝，在大佬陪同下，李兆基才肯開腔講自己為何弄得如斯田地。
兩人說起當年入了黑社會，為了應付生活，他們偷車用來運毒，甚至打劫，李兆基自認是偷車專家：「Fiat（快意）最易偷，仲有摩利士咪拿（Morris Minor）、Cooper仔（mini cooper），試過偷完車，原本泊喺度嗰個錶位仲係空，用完咁咪泊番原本個位，除非車主又檢查咪數，否則車主不會發覺。」
李兆基難得顯露微笑：「我從垃圾籮搣一條竹籤，就已經可以打開車門。有一次好好笑，有兄弟睇水，我負責偷車，上了架車，點知車主回來頂着車門，問你們做什麼？我便跟他說，乜架車原來係你㗎？我只好說不好意思，然後推門落車。」
他其實另有一花名是「吹水基」，他風騷牙擦，轉數快口才了得，例如14K已故元老鬍鬚勇在香格里拉酒店擺江湖壽宴，搵同樣是14K出身的李兆基（多年前已退出）做司儀，當時李兆基中氣十足，令到現場氣氛生色不少。
「而家不能認叻，我以前很自負的。」李兆基細數以前電影威水史，那是一眨眼風雲。「有些電影場面大，臨時演員做得不傳神，導演應付不了，於是我找一班坐過監的古惑仔，叫他們拍暴動，一take過！」
在朋友聚會講開娛圈往事，不忘發揮他吹水唔抹嘴的本色，例如李兆基當年參與九六年《慈雲山十三太保》的電影，電影一邊拍攝一邊寫劇本，李兆基臨急度劇情，煙癮極深的李兆基回憶說：「我沒有煙抽，所以不懂得寫，於是副導演立刻叫場務買煙給我，之後個個都話個結局寫得好！」
李兆基參演的電影，大部分是以黑幫為題材，包括《古惑仔》和監獄內的監躉，他拍得維肖維妙，全因他本身是古惑仔出身，六十年代，陳慎芝和他是五十年兄弟，由細玩到大，陳慎芝十分了解李兆基性格，他開玩笑說：「佢個樣生得惡，我哋以前喺慈雲山開片，大家互兇對方，阿基企最後，唔係殿後，係因為可以第一個走！」
李兆基出名是惡人，但尊敬陳慎芝一世都當他是大佬，無論他怎鬧，七十歲了仍默不作聲，不敢駁嘴，李兆基說：「都俾佢鬧咗五十年，習慣了。」
採訪：陳慧瑩
攝影：韋平
|
鍾意就快D Share啦！
|
|
|