今個月初，是食衞局前局長周一嶽（右），加入友邦任首席醫務官及企業顧問後首度現身，講解弄至滿城風雨的醫療保險。左為當日有份講解、與 AIA是「合作夥伴」的馬智勉醫生。
壹號頭條
揭 AIA「一條龍」賺到盡
一本毫不起眼的醫療小冊子，引爆出一個陰謀。早前 AIA（ 1299）突然向私家醫生發信，爆出投保人需否住院，竟要符合 AIA的「醫療所需」定義。「簡單手術」如照腸鏡等，鼓勵在日間診所進行，無須過夜。新措施一出，被醫學界狠批罔顧病人安危，之後 AIA不斷公開解釋，但未能釋除疑慮。
本刊經多方渠道收到消息，發現這只是 AIA食事件的第一步。 AIA內部有張「不合作醫生」（ Uncooperative Doctor List）的黑名單，將部分醫生排在前面，要保險經紀多加留意。名單中，有風濕專科醫生、王穎妤兄長王紹文的名字在內。而 AIA在解畫記招上邀請的顧問醫生馬智勉，原來上年在尖沙咀開設了「新醫療中心」，並與 AIA拍住做合作夥伴。每日都有經紀帶客人上來參觀，鼓勵在這「診所」開刀做手術。 AIA與部分醫生合作，自然可提供「一條龍」服務、兼且賺到盡。
上年三月，每週一鑊的前衞生福利及食物局局長周一嶽，受僱為 AIA香港及澳門首席醫務官及企業顧問，專責醫療保險項目。在此職快將一年，他又要為最近 AIA這壇「大鑊嘢」拆彈。雖然多番解釋，但在醫生界仍引起極大反彈；有醫生指，不少同行都有買 AIA最貴的醫保「 CEO plan」，正考慮「 cut單」：「呢個 plan包好多嘢，好多醫生都成家人一齊買。依家 AIA單方面收窄索償條件，對投保人好唔公道。」他自己亦已決定「 cut單」：「個 agent識咗好多年，預咗會反面，但都無辦法。」
公關災難
事件始於今年一月， AIA向私家醫生發信，重申：若投保人入住醫院做照腸鏡等、可在門診處理的「簡單醫療程序」，而又不符合該公司判斷為「醫療所需」（ medically necessary），有可能不獲住院賠償。有病人即爆照腸鏡過程並不簡單：「要清空條腸，就要先飲幾公升藥水，將腸內嘅穢物屙晒出來。其間屙到無力，屙到頭暈眼花，有一定風險。」
本刊再拿到一份只供 AIA特級客戶查閱的「健康之寶」小冊子，列明哪一項「身體小毛病」，推薦到「診所」進行。除了照腸鏡，當中竟包括氣胸、腰椎穿刺等高風險手術。 AIA之後回覆本刊，表內手術只作參考用途，旨在闡述公司的醫療保障，已擴展至日間手術，無需留院也可獲得賠償。而有關留院是否醫療所需，由主診醫生提供足夠資料證明。
有保險業界人士指，若病人由私家醫院轉到日間手術中心進行小型手術，最多可節省三倍開支：「好似照腸鏡咁，坊間日間手術中心夾埋都係幾千蚊左右，但每間私家醫院收費差距就好大，好似養和咁，起碼要兩、三萬元。」
疑似黑名單
據知， AIA會定時統計每名醫生的索賠原因，部分醫生會列入「不合作醫生」名單，要經紀多加留意。記者閱覽該「不合作醫生」名單，發現表內包括現職風濕專科醫生、王穎妤兄長王紹文。本刊就名單一事向王紹文查詢，他要求記者先留下問題，但最後並未回覆。至於另一位在名單內的外科醫生岑緯邦，其診所職員表示不會接受傳媒訪問。
本刊查詢 AIA，對方坦承有「不合作醫生」名單存在：「好似有啲醫生寫嘅手術原因，寫極都係『客人需要』、『個肚好痛』，最終都係搵唔到病因。如果係嘅話，我哋會提醒 agent，處理客人理賠時要留意。」他重申只有少量醫生列入名單，不構成「不尊重醫生」。對此，醫學會義務秘書，外科醫生林哲玄則指：「我好有興趣知咩叫不合作。我睇唔到邊一方面醫生需要同保險公司合作，我永遠只係對病人。如果有啲嘢係保險公司要求醫生去做，咁我一定係不合作，我點解要睬佢？佢係邊間醫學士？」
與診所關係密切
AIA的終極目標，是食埋「做手術」的大茶飯。早前 AIA舉行有關醫保的傳媒工作坊，在台上的除了是要補鑊的周一嶽醫生，旁邊竟然有一位並非 AIA管理層的「顧問」、外科醫生馬智勉，而且當日發言時間不少。記者翻查公司註冊處資料，發現馬智勉在去年中，於尖沙咀美麗華中心成立了一家名為「新醫療中心」的手術診所；記者再上門，就發現馬智勉與 AIA，原來關係密切。
在該中心的門口玻璃，除印有「新醫療中心」字樣，竟然亦有 AIA的 logo。在該樓層的電梯大堂，有不少保險經紀陪同病人等候。記者以客人身份查詢，中心職員指：「呢度門診就收八百到一千，唔包藥，就算喺出面睇過都要喺度睇多次先。」她就指若購買了 AIA的 CEO plan，門診當日病人就省卻「先付款再索償」這手續。
記者翻閱新醫療中心的開幕典禮簡報，內容多次提及 AIA的名稱，其中包括「 First and only center named as Premier Medical Provider of AIA」（第一及唯一一間中心被 AIA命名為首間醫療提供者）、」「 Ambassador to take care of AIA customers」（ AIA客戶照顧大使）。
各科有卓越表現
身為中心創辦人的馬智勉醫生，在中心的官方網址介紹他為：「一九七七年香港大學畢業，成績優異，一百五十人中考取首四名。在頭、頸、乳房、食道、胃部、肝、胰、腸、膽囊及前列腺等癌症手術均有卓越的表現。」科科都得，猶如電視劇裡的超能醫生。馬醫生熱愛賽車，多次參加保時捷卡雷拉盃，他的賽車造型照亦放在中心的當眼位置，惟○九年曾被控不小心駕駛。記者發現十多年前他更與郭富城一同參賽，當時奪得第三名。其小兒子馬信山，在三年前曾參加無綫真人騷節目《搵個好男人》，並在 Facebook設立專頁，聲稱自己為「大眼、是 Software Engineer」。
現時新醫療中心除了馬智勉外，另外還有腸胃肝臟專科的李恆輝醫生，以及心臟專科的黃煒倫醫生。前者曾是威爾斯醫院醫生，後者則來自法國醫院。據知新醫療中心在公立及私家醫院挖角，其中包括將軍澳醫院等。而且會在港島區開多一間。
戰略合作夥伴
對於與新醫療中心的關係， AIA公關回覆指，無參與任何「新醫療中心」的投資，但承認雙方是「戰略合作夥伴」。「咩嘢叫做戰略合作夥伴呢？最主要係客人有一個特別嘅服務。因為我哋每一個做嘅個案，去呢啲日間醫療診所，我哋都要客人俾分，睇吓佢做得好唔好，如果做得唔好就會除名。」
馬智勉醫生在 AIA有另一個身份，叫「 External Medical Advisor」，「主要幫我哋睇一啲奇難雜症嘅 case。我哋有一啲個案會交俾佢做一啲研究，同埋話俾我哋聽一啲意見。」公關又解釋當日馬智勉醫生在記招上出現，是因為：「佢喺腸胃鏡方面係一個好有經驗嘅醫生，所以邀請佢嚟。」
馬智勉的回應與 AIA可謂口吻一致，指 AIA沒有參與投資及營運，他們是 AIA其中一個 panel doctor。當日出席開幕禮的 AIA經紀，都是「以個人身份和名義出席」，但亦承認目前是第一家「 Premier Medical Provider of AIA」，日後將有更多此類型日間手術中心及醫院加入行列。他又強調：「照腸鏡和小手術，風險和在醫院相若，但病人會比較方便和減少交差感染。」
收緊入院門檻
姑勿論如何，有不願公開身份的醫生直指，近日 AIA已收緊病人入院門檻：「原本有病人已排期入院照腸鏡，寫好晒詳細證明病人屙血，情況嚴重要求入院。但係上星期病人同我講 AIA唔批， claim唔到，但以往一直都可以，最後個病人被迫喺日間手術中心做，病人梗係好無奈。」
林哲玄醫生舉例指，日間診所做手術亦有其風險：「好似有個三十幾歲嘅成年人，我用手摸已經摸到腸裡面有個腫瘤，但腸唔係全閉，呢個 case係可以喺屋企飲瀉藥，無話唔得，但風險高好多。同埋我之前已經摸到個腫瘤，掃描、驗血基本上一定要做，如果喺醫院當然一齊做埋，排好手術期先出院。但係如果喺中心做，做完又要自己去化驗所做掃描，再隔多個禮拜先嚟覆診，程序上係可以，但係香港人想唔想要呢種服務？」
他補充，現時市民購買醫保十分普遍，政府必須確保醫保覆蓋範圍及條款是否合乎公眾利益：「之前政府推自願醫保，我都係諮詢委員會成員之一，當時政府希望市民增加對醫保嘅信心，但討論咗兩年，理賠原則同條款差唔多冇傾過，依家呢件事爆出嚟，我諗政府都要留意。」
Cut單潮
事件已演變成 AIA與醫生界的爭辯， AIA公關對收緊門檻一事，向醫生「開火」：「我講一個 example，如果係好急需當晚即時 emergency入院做手術，我相信我哋絕對係一定會作出賠償。但如果係急需但排期兩三個星期，都唔去等待時間較短的日間手術中心做，咁我哋就會懷疑點解佢要話係急需？」
有 AIA前線員工指，事件已嚴重影響士氣：「初步對生意無影響，但係好多同事都質疑，點解要出封醫療須知信。有部門阿頭甚至喺 Facebook搞一人一 claim report活動，叫啲同事俾客人睇，證明正常情況係 claim得足。」但有其他保險公司經紀就指，近日不少持 AIA醫保的客人，主動查詢轉保單事宜，似乎 AIA仍要繼續拆彈。
買醫療定危疾 保險三大 Tips
不少市民都會購買醫療保險，為求多一個保障，但透明度不足問題一直存在。近日有業界人士就在網上自發群組「 Dark Money」，披露投保陷阱，更坦言：「十個有九個都唔知自己買咗乜！」他們更向本刊大爆，購買醫療保險的三大陷阱。
一、醫保及危疾大不同
坊間不少人都對危疾保險存有誤解，以為是保障較嚴重的疾病，而不少保險公司會要求代理向客人銷售時，建議和其他類型保險一同銷售，「 Dark Money」重申，市民購買危疾保險，原意應是因不幸患大病，未能工作，以保障家庭的開支，如供樓、子女學費等。該類保險較適合家庭經濟支柱或在職人士投保，而不是用作入院手術費等醫療開支。而要索償醫療開支，買的就是醫療保險。
他亦發現市面上大部分保單將大部分保額都投放在危疾，在醫療方面的保額不足：「一般危疾只會包佢保單上列明嘅病，無講就唔包，就算係喺名單上都要患到一定嘅程度，例如之前單原位癌事件，未病到索償要求都唔保。」
二、索償額計法不同
個別的保險公司會有實質數字列明最高的賠償金額，而部分公司就只會以費用成數列明，「 Dark Money」解釋：「有啲會寫根據手術的複雜程度而定，會寫明咩手術 claim幾多 percent，最低見過二點幾都有。所以買之前就一定要拎番 provision嚟睇。但有啲公司只用小中大同複雜手術計，要寫埋價錢，透明度先高啲。」
三、銀行買 plan無 agent跟
近年不少銀行銷售保險，但「 Dark Money」就指，銀行從業員不是保險代理，當投保人需要索償時，就沒有專人協助：「去到想 claim時，佢可能只會問番你啲背景資料，就好似孤兒單，無人教你點填啲 form，服務相對就冇咁好。」
撰文：梁延宇
攝影：財經組
攝錄：財經組
news@nextdigital.com.hk
|
鍾意就快D Share啦！
|
|
|