探熱針
過氣未婚夫 Martin當街小便 陳雅倫：佢成日都係咁！
陳雅倫與吳彥祖表哥 Martin拍拖半年，二月宣布拉埋天窗，但三月就斬纜玩完。寧願婚事撻 Q，都唔想上錯賊船的陳雅倫直指 Martin「死因」，包括攬女、玩失蹤、講大話，最大罪當然係求婚唔認數。
Martin唔只底花，亦缺公德心，本刊收到爆料爆片， Martin有廁所唔借，花槽射尿，當街小便。
一聞前度缺德行為，陳雅倫忍唔住寸對方：「佢成日都係咁，四圍屙尿。」
花槽當尿兜
陳雅倫過氣未婚夫 Martin唔止花心，亦好冇公德心。從爆片中睇到，當晚飲到啤啤夫的他，身處布滿酒吧餐廳的尖沙咀天文台圍，人有三急大把廁所可借，但 Martin偏偏選擇就地解決，鎖定花槽當尿兜，就拉開褲鏈「淋花」。
尿窒唔暢順
在街燈照明下， Martin「灌溉」過程相當高清。其「水流」窒吓窒吓，唔多暢順。加上飲醉企唔穩， Martin一半射花槽，一半彈晒落地，相當嘔心。當街小便過程歷時足足分幾鐘，睇嚟 Martin的膀胱相當大負荷。
陳雅倫勸佢唔掂
得悉前度當街屙尿，陳雅倫「吓」咗一聲，就忍唔住寸爆佢個腎。「唔係啩，咁唔小心，又俾人影到佢屙尿！佢成日都係咁。」言下之意，即 Martin係慣匪。
講到 Martin呢個習慣，陳雅倫不吐不快。「以前同佢行街，由下午行到夜晚，佢一急，明明有酒樓可以借廁所，佢唔借，企喺後巷就咁……，唔好睇嘛！又冇公德心，同佢講咗好多次，都唔聽。」
當街小解無畏色
個人喜好，唔易改。陳雅倫續說：「佢成日飲醉，要我接佢走。佢飲醉就四圍屙尿，你係男人都唔可以咁做，呢樣嘢犯法㗎嘛！仲要喺光猛地方，唔怕人見到，真係幫唔到佢。」
Martin北上從商多年，可能忘記香港法例。提提他，根據《公眾潔淨及防止妨擾規例》，任何人士在公眾地方大、小便均屬違法，初犯最高罰款五千元，重則罰二萬五及監禁六個月。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|