劉鑾雄，股壇狙擊手，華置前任董事會主席兼行政總裁。風扇廠起家，人稱「大劉」。前妻是寶詠琴，去年11月再婚，娶陳凱韻(甘比)為妻。大劉，真名劉鑾雄，以出手闊綽見稱，動輒送物業送珠寶送Hermès，家眷工人都受惠。金句不絕，最叻幫人改花名，明星女友無數。不過俱往矣，大劉已經找到最後一個女人——甘比陳凱韻。就咁睇，「大劉」的生活，好似比「劉鑾雄」精采得多。廣大市民對「大劉的故事」需求甚殷，但「大劉」其實一粒聲都冇出過，因為真人根本未有接受訪問。由今日(29日)開始，《蘋果》娛樂呈獻一系列「劉鑾雄講大劉」，大劉首度接受傳媒訪問，由孩童時期講到最後一個女人甘比。第一集，先由大劉曾因為冇錢出院而痛哭講起。曾經有報道指，成為千億富豪之前的大劉，在外國讀大學期間學人追女仔，但又不夠錢，要問同學借錢。是真是假？大劉本人親自說：「一定，完全，絕對冇！」「第一，我喺多倫多住嗰陣時有追下女仔，家姐細佬妹喺度，如果我手緊，隨時可以同佢哋借，使乜同其他人借？」「第二，當時個個學生都好窮，租房係20幾蚊加拿大紙，邊個借到畀我哋？而且我喺溫莎大學讀書嗰陣，驚畢唔到業，所以好俾心機讀書，嗰時已經有固定女朋友，冇話四圍追女仔。」「我肯定同你講，我喺多倫多嗰幾年，同溫莎嗰兩年，完全冇試過問任何一個同學借錢：同埋我阿媽好錫我，我做嘢又好小心，當我啲錢仲有十日八日用完，我已經打電話畀佢，快就兩日，慢就三日，一定會到。」【「我未試過買二手車」】
當年大劉因為出手闊綽，又經常請人食飯，在華人學生圈子本已頗有名氣，好多女孩子主動想認識，根本毋須花太多錢追女仔。大劉也說：「因為阿媽（劉葉淑婉女士）錫我同縱我，錢好鬆動，嗰時使幾錢，其實好細數目。而且當時嘅環境，點使用錢？因為我架車好靚，全多倫多唐人街最靚嘅車。事實上阿媽好縱我，唔應該買咁嘅車。」「仲有，我未試過買二手車，全部都係全新嘅！所以啲人話我買二手車、借錢追女仔，呢啲唔係誣衊，係夾硬作出嚟詆毀我！肯定呀，百份之一千呀！如果我有借錢追女仔，絕子絕孫！」【六千蚊都要問人借】
大劉不是沒試過問人借錢，但次數極少。第一次借錢，是因為住院，他還因為沒錢出院，一個大男人在病房悲涼痛哭：「我一生人第一次同人借錢，你估都估唔到我同邊個借，係我屋企個工人。借咗五、六千蚊出院，因為我喺醫院做咗手術，冇錢出院，冇人肯同我找呢條醫院數，我自己又冇積蓄。」劉老太既然如此寵他，何以沒有替他埋單出院呢？大劉無奈地謂說：「咁佢唔喺香港嘛！」至親亦袖手旁觀？「有時睇電視劇，古裝又好現代又好，都好多呢啲慘變。當一個人叻嘅時候，就會有好多人圍攻你。我阿媽間工廠以前好『豆泥』，一年嘅生意額做300幾萬，第二年我已經由300幾萬變千幾萬，而且我喺我阿媽公司佔嘅大股份，所以啲人咪郁我囉。」【抱憾恩人中風離世】
問到家族中誰人生妒忌？大劉不願多說：「唉！呢啲太複雜我唔想講，同埋有啲人都已經死咗，總之冇人同我找數先迫我起革命，因為以前我係使阿媽錢，我都唔需要有積蓄，以前讀完書返嚟，阿媽買隻錶畀我20幾萬，已經可以買到一層豪宅。」堂堂少爺仔，慘情到要向老傭人借錢出院，大劉回想仍然激動：「乜嘢嬲吖，嗰時邊個擋我就殺邊個，我唔怕同你講！首先，同工人借咗五、六千蚊出院後，知道唔係『槍桿子裡出政權』唔得，所以一定要自己出嚟起革命……」後來大劉發跡，好想報答這位傭人，只可惜她在87年股災後中風離世，大劉一直抱憾未能好好報答這位傭人的恩情。統籌、採訪：陳月媚
攝影：陳俊強
攝錄：NEO、馮嘉銘、吉吉
【話你知】同大劉有關係嘅名人、美女有幾多? 即睇「大劉人物關係圖」: http://bit.ly/JosephLau
| 攝影：陳俊強 | | |
| | | |
| | | |
| | |
|
鍾意就快D Share啦！
|
|
|