謝婷婷、周嘉玲、曾昭亮噚日喺中環出席美容產品發佈會，婷婷話自己啱啱喺美國洛杉磯返香港，喺美國咪可以見鷹眼Jeremy Lee Renner，婷婷大方承認佢哋嘅關係大躍進，更見過對方嘅家長，婷婷話：「有，我仲拍咗一條武打短片，之前拍《歐洲攻略》識咗一個師傅，去咗一個沙漠，打咗10個鐘，開頭諗住玩下，但係無諗過咁認真，遲啲會放出來。」講到情人節係咪同Jeremy一齊度過：「無特別慶祝，情人節前夕見過面。」問佢係咪二人首個情人節？「冇特別慶祝情人節。」咁發展成點？佢話：「唔好咁快，俾多啲時間。就係爭時間。」婷婷仲話Jeremy好支持佢喺美國發展，但係佢強調留美唔係為咗Jeremy：「喺L.A.識咗好多人，有進步，搵到一間演藝學校，私人教演戲，我估嗰邊生活適合我多啲。」婷婷話佢哋一齊冇傾工作，講到男友係咪好支持佢，佢甜笑點頭話：「咁大個女唔想放係愛情先，嗰邊機會多越來越好，唔會因為佢而留低。」問佢哋發展到見家長未？婷婷話唔想俾佢見，之但係佢已經見咗男友家長，咁人哋父母對佢有咩意見？「我都係傳統家庭，見人都有禮貌，同佢哋關係幾好。」咁去到談婚論嫁未？佢好驚訝咁話：「OH MY GOD，未係呢個step。」不過，二個人相差12年，婷婷話：「都冇阻礙，我自己比實際年紀成熟。」咁對方係咪MR RIGHT？佢話：「冇一個係咁樣，我可以好多checklist。」另外，曾昭亮懷住7個月大嘅肚，著住對3吋高跟鞋出現，佢話：「4月尾生，係一個好美麗嘅意外，之後會帶埋個仔一齊影相，老公唔鍾意影，第一胎無影，會影番，可能係最後一胎。」
| 婷婷透露情人節前夕同Jeremy慶祝。(攝影﹕羅慧敏) | | |
來源 source: http://s.nextmedia.com
|
鍾意就快D Share啦！
|
|
|