近日「花生」賣斷貨！網上討論區都因為太多留言而一度擠塞，講嘅就係近日網上爆出一單「新娘唔找化妝師尾數」一事，不過，做過化妝師嘅藝人甄詠珊接受訪問時話冇遇過啲麻煩客。唔通真係呢位化妝師咁唔好彩……今日《蘋果》打俾今次事件嘅當事人化妝師April，佢語氣平靜咁話：「暫時唔方便講，我仲處理緊件事。」先簡單解說一下件事嘅經過。上周五(10日)，有新娘化妝師喺fb貼文，指自己化咗新娘妝8年，日前竟然遇到一對極品新人，過程更遇上奇恥大辱，除咗被新娘呼喝要佢拖裙擺，散場找尾數時，新人更用各種理由，如補妝次數唔夠密，冇喺新娘身邊Stand by，坐埋一邊玩手機等等，堅持唔肯找尾數，更有20幾人圍實化妝師，有人叫化妝師做「賤人」、有人鬧佢「做人點解可以衰到咁」。最後勞動警方，5千幾蚊尾數新人係找咗，不過1,300蚊OT錢就冇俾到，至於70蚊(但新人一方指係$31.8)的士錢， 新人一方就數毫子俾化妝師找數。化妝師忍唔住喊，有兄弟喺側邊扮佢喊聲……事後唔少網民撐化妝師，指茶餐廳食飯就算唔啱胃口，都要俾足錢，不過亦有新人一方嘅朋友，指責化妝師當日唔盡責，而且更指的士錢條數有呃錢之嫌。但由於群情太過洶湧，有網民極速起咗兩個新人個底，包括曾經做私影model嘅新娘同埋疑似做警察嘅新郎之餘，連新人好友個底，亦紛紛俾網民搜括。其實誰是誰非都好，件事已經俾網民消化得七七八八，花生價格指數亦逐漸回落緊，點知呢件事後，一直隱藏fb嘅新郎，噚晚忽然走出嚟，貼埋單據指化妝師擅自更改單據，將提早到場時段收費由300蚊1小時改成500蚊。又澄清冇動員親戚圍化妝師。不過事後有化妝師舊客人貼出以往單據，指化妝師一直都係手寫改成500蚊，而且亦清楚講明package包啲乜，唔存在欺詐成份。
|
鍾意就快D Share啦！
|
|
|
