好演員買少見少，尤其依家通街求其有眼耳口鼻都叫女神嘅年代，未講係咪識做戲，已經叫定做女神！所以話冇蒲頭好耐嘅張敏強勢回歸，我Nuts哥真係嚇咗一跳㗎！個震撼程度，好比周星馳嗰句：「各位觀眾，四條煙！」綺夢，你返嚟嗱？
貴為九十年代經典性感女神嘅張敏，最巴閉係，你數得出嘅賣座電影都係佢主演，而周星馳主演嘅電影，佔八成都係佢做女主角。我Nuts哥最佩服，當年唔少性感女神幾乎全部清一色，邊騷胸晒腿，邊大唱「張開我的，交出你的」、「來吧我甚麼都應承」而出位，張敏根本都唔使刻意性感賣大包，頂多間中低胸、件衫緊啲騷吓葫蘆身形，實行禾稈冚珍珠，都一樣畀大家無限Fantasy。大膽出位極都只係限於對白，最經典係張敏喺電影《火舞風雲》飾演被迫落火坑做舞小姐嘅乖乖女，慘慘豬咁講一句：「我畀你扑！」為救屋企人而含淚送上門畀秦沛魚肉，可憐天下父母心！
烈女作風 性格不變
當年邊有咁多PS、玻尿酸同Botox？比起依家呢代要玩童顏同巨乳，張敏嗰代簡直係百分百天然美。張敏嘅靚，係冷靜與熱情之間，嫣然一笑，盡集回眸一笑百媚生，並有笑傲江湖之效。《倚天屠龍記》嘅「趙敏」、《逃學威龍》嘅「Miss Ho」全部都係一個也不能少嘅集體回憶，最難忘梗係同周星馳合演電影《賭聖》嘅「綺夢」，一個「綺夢」都夠喇啩！「綺夢」就好似美國嘅瑪麗蓮夢露一樣係sexy icon，更係張敏嘅代名詞，佢唔單止樣靚身材正，騷在骨子裏，就連胳肋底都sexy過人有粒銷魂痣，搞到周星馳幾乎唔使含笑都半步釘！
阿媽、怨婦或做甘草？
張敏話：「我想簡單的回來。」仲話自己從來未退出過娛樂圈，如果有好劇本一定會拍。查實張敏銷聲匿迹十幾年，早年仲話佢已經結埋婚做人妻，點知佢突然彈出嚟話冇結過婚，隨時準備出山之餘，仲承認戀上細佢十年嘅導演男友「脹面子華」，早兩日更孖咇嚟香港拍拖，sweet到呢！近年潛心學佛嘅張敏話就話比以前更平靜更睇得開，但冇變嘅係佢嗰份敢作敢為，無事不可對人言嘅烈女作風！未正式開工復出，已經一地花生話題多多，如果張敏真係有戲上，睇怕唔使擔心票房叫座力！但我Nuts哥就覺得，復出易，定位難！年屆49歲嘅張敏得天獨厚美艷如昔，樣貌身形完全敵得過地心吸力，依然仲有大批粉絲。但只怕一子錯滿盤皆落索，萬一有咩差池，綺夢變噩夢，爛尾收場嘅話，真係前功盡廢！當年集仙氣霸氣嘅性感尤物，唔通要做人阿媽、怨婦或做甘草？好殘忍啫！我Nuts哥真係唔忍心囉！唔通真係要兩手一伸，再騷胳肋底嗰粒闊別廿年嘅銷魂痣？
不許人間見白頭
自古美人如名將，不許人間見白頭，更何況係萬千男士心目中嘅綺夢？相見不如懷念，最燦爛最美麗長留大家腦海，係最完美嘅句號。如果張敏真係想重返大銀幕，我Nuts哥覺得復出第一步真係要非常小心，慎重選擇！近年匿埋幕後做導演嘅周星馳，其實可以考慮吓，同張敏呢位昔日好拍檔，相隔23年後再合作。如果拍番部《3D綺夢大鬧西遊》又或者係《西遊降魔篇之綺夢七號》，嘩！齋睇戲名，都想睇
|
鍾意就快D Share啦！
|
|
|
