孭住劉家榮兒子、劉家良姪仔身份，偏偏劉永健未有依靠任何關係，喺大台打滾多年，不斷飾演乞人憎嘅奸角、衰公子、二世祖等角色。其實，身材高大嘅永健夠型夠靚仔，根本不愁出路，現時佢繼續邊演戲邊搞唔同生意。成日做嚟做去都係大奸角，講到自己個樣，永健話：「其實我都覺得有啲奸架，有時唔笑個樣都俾人話我好惡。個個都係想做小生，正派角色，但係公司畀到你，你就要做架啦。做奸有陣時都幾好玩，作為演員唔會介意。」永健仲話俾大台認定咗你係反派就反派，撈咁耐唯一一部做正派公子嘅，係張乾文搵佢演嘅《雲海玉弓緣》。喺大台撈到一肚火，不受尊重同埋被刪戲份，解約後永健北上發展，生意亦百足咁多爪，收入仲好過喺TVB。「其實我冇停過拍戲，只不過我唔喺香港咋嘛，我啱啱先喺徐州、上海拍完戲返嚟。而家我有餐廳、有自己服裝品牌、 有網上電子商業嘅渠道。」原來永健從未拍過香港電影，喺度向各大導演呼籲，想搵專業演員嘅話，記住考慮永健。「我未拍過香港電影，哪怕係一兩個鏡頭，出鏡講『係呀』、『你好』，我都好開心。」同永健專訪期間，佢嘅hehe緋聞女/男友唐文龍突入，仲親口解釋兩人關係同擇偶條。永健話：「呢間餐廳就係我同唐文龍兩個有份投資嘅，我鍾意大隻啦，有胸肌啦，有鬍鬚啦，最緊要陪我去超級市場！（同文龍好吻合喎）」不過文龍即場反駁：「我鍾意身材好，白雪雪同埋後生囉，不過我鍾意女人，你就鍾意男人吖嘛！」哈，「兩公婆」好鍾意耍花槍呀吓，永健更喺鏡頭前稱呼文龍：「我直頭愛你添啦老公！唐文龍係非常非常嘅一個暖男！」記者：嵐山、馮國康、趙永傑
場地提供：昭和食堂
| (攝影：馮峰、Neo、沈健程) |  劉永健從未依靠關係入娛圈，而家就主力搞生意。 |  永健看透圈中冷暖，唔再留戀喺大台。 |
 依然熱愛拍戲嘅永健，絕對係專業演員。 |  永健話遇低潮時，有唐文龍背後默默支持（咦？情侶皮褸喎）。 |  永健同文龍拍完《十月初五的月光》後開始熟絡，越夾越啱key。 |
 兩公婆......吖唔係，兩兄弟friend過打band，連影相都要整蠱對方。 |  文龍型爆look。 |  兩位親自解釋緋聞同講擇偶條件。 |
來源 source: http://s.nextmedia.com
|
鍾意就快D Share啦！
|
