郭偉亮滑雪唔小心整傷，仲搞到要坐輪椅，慘慘豬
音樂人郭偉亮（Eric）同老婆葉佩雯（Grace）喺今年1月先去完日本北海道滑雪，慶祝相戀16年。熱愛滑雪嘅佢哋，最近又去咗北海道旅行，雖然佢哋唔係滑雪初哥，但係呢次Eric就唔少整親，搞到要坐輪椅㖭，陰公豬囉！Eric喺Instagram上載自己攤喺梳化嘅相，見到佢左手同左腳都敷緊冰，留言話：「左手左腳 at the same time can be challenging（在同一時間受傷可以是具有挑戰性）。」
愛夫心切嘅Grace都有喺網上留言鼓勵老公：「No pain no gain ，小意外整親在所難免，希望好快好番。」之後Grace仲有上載咗Eric坐輪椅行超市嘅短片，留言話：「表哥表弟患難見真情，冇得滑雪惟有Shopping。」Eric又以第一身角度拍攝，以英文話：「平時你推嘅係購物車，但今日係我！」整親都仲識講笑，應該唔係好嚴重嘅，下次要小心啲
有老婆做看護
Eric接受東網訪問，佢苦笑：「好嚴重呀，嚴重依家冇得玩呀！嚟緊呢三日玩唔到雪，好嚴重呀！」仲掛住玩！佢話：「依家喺北海道，玩咗幾日，好唔好彩，原本一直都冇事，跳得好好，但最後放鬆咗，跌咗落坑度。原本諗住約埋表哥玩，因為佢唔玩花式嘅，我打算玩埋最後一次就唔玩，點知出咗事。拗咗左手同埋左腳，真係左手左腳，腫晒囉，敷咗成日冰！」佢又話依家行動唔方便，咩都要老婆幫，好似大少爺咁：「老婆幫我抹身，我以前洗臉都冇乾淨，佢仲幫我黐埋黑頭貼，從未試過咁享受。」佢話依家行路好細步，行得好慢，感受到阿伯90歲行路嘅感覺。
葉佩雯就話：「原本諗住嚟休息，點知變咗私家看護。佢同我講話唔得喇，我冇親眼見到佢受傷，都係收到佢message先知。照顧老公ok嘅，佢當休息吓拎靈感囉。」
來源 source: http://hk.on.cc
|
鍾意就快D Share啦！
|
|
|
