去年才剛畢業的 Curtis堅持只打自己工，每天也會穿著整齊西裝「上班」，希望成為人辦讓更多人了解到洋服的可塑性。
壹盤生意
貪靚 Fresh Grad賣彩虹七色皮鞋 月入過三萬
常言道：「女人開心買鞋，唔開心又買鞋。」但買鞋又點只是女士專利？
眼前穿著整套筆直西裝、腳踏皮鞋的何俊傑（ Curtis），正正印證了男生同樣貪靚，由領帶到襪子全都各有着墨的他，由專攻潮流波鞋到轉投經典皮鞋的懷抱，年僅廿二歲已儲落近四十套西裝及皮鞋。「屋企人覺得我係玩物喪志，認為我過度消費。」但正因對打扮有着莫名執着， Curtis在畢業後創立自家皮鞋品牌 The Korner，更誤打誤撞開展了洋服生意。「兩邊生意加埋平均有三至四萬元落袋，以 Fresh Grad而言，呢個數絕對值得我堅持落去。」
Curtis能在瘋狂購物的同時，保持理智度橋賺錢，證明了玩物其實同樣能夠發圍。
定價實惠 三對等如一對波鞋
「我唔希望買嘢單純係消費，而係希望喺消費過程中學習，得以維生或賺取收入。」 Curtis坦言曾被家人批評為只會消費、不善生產的港孩，一直尋求能逆轉他們觀念的機會。「十六歲時我會追逐日本品牌，嗰陣已經發現不停買其實一定唔掂，所以開始喺網上放售我著夠嘅二手名牌衫，做咗三年後就轉為買賣波鞋。」由買到賣，談的都是興趣，結果他去年於恒管新聞系畢業後，不顧父母望他投考海關的期望，用多年做各類買賣所得的積蓄創立自家品牌 The Korner。「認識歐洲皮廠係我去旅行時，有朋友介紹我親自去睇，結果我決定喺西班牙、葡萄牙等地入皮，再自己設計，喺內地廠房生產。」現時 The Korner設四至五款男女裝皮鞋，女裝猄皮豆豆鞋（ Driving Shoes）的定價為四百九十元，千二元有三對；男裝則是五百二十元一對，千三元有三對。 Curtis解釋：「依家熱賣嘅波鞋閒閒哋都要過千元一對，同樣價格買到三對希望可以增加客人購買誘因，搵埋朋友夾份一齊買。」客人 Karine正正買過三對豆豆鞋，她指：「呢款鞋有著過大牌子，四位數字都試過有一對。但其實 The Korner著上後感覺都差不多，所以覺得抵買。」歐洲選皮而於內地製造的形式有助整體開支拉上補下，每月賣出二百對，每對毛利率約有三成。
廿一隻色吸眼球 只攻六色存貨
「買嘢講第一印象，咁多隻色係為咗令人記得，覺得有好多選擇。」 The Korner除提供基本的黑白灰及啡色外，另有齊彩虹七色，單是藍色也有三種選擇，實在令人花多眼亂。但 Curtis指，客人心再亂，最終也傾向選擇踏實易襯的顏色。「所以我哋得六至七隻色有存貨，其他冷門顏色要訂，以免積貨。」訂貨時間為兩至三星期，同時可按客人要求訂做特別款式，例如配皮混搭、選取特別皮線等。「我哋提供一次免費換鞋服務，如果訂貨收到後發現顏色唔啱心水，可以換一次貨。」有貨在手，就要開始尋找寄賣點，當中三個位於荃灣、元朗及葵芳，上架費合共約一萬元，然後再用月租形式寄賣。「每間只會提供四至五隻顏色嘅鞋，希望幫到我清貨。」
港孩變老闆 一招冧掂年長客
Curtis在尋找寄賣點時，更意外認識了位於銅鑼灣的洋服店 The Hackney，由合作變為半個老闆，從「鞋痴」到迷上西裝。「接觸皮鞋時發現一定要西褲同恤衫嘅打扮先襯到，識到 The Hackney後發現兩個品牌可以互助互利，結果就入咗股。」 The Hackney主要為客人訂製西裝，當中不乏已上年紀的專業人士， Curtis要說服的，更包括合作的上海做衫師傅。「如果唔係做訪問，我都唔會剃鬚，想客人望落覺得我成熟啲。」他摸着下巴說。說是老闆， Curtis笑稱自己其實與 sales無分別，指穿起西裝及皮鞋時一定要有型有款，讓客人發現穿洋服更多的可能性，得到配搭的啟發。外貌及衣著再成熟也只是打開話匣子的首步。「我自己嗰四十套西裝差唔多全部都係訂做，好多玩味較重嘅圖案同顏色我都試過，例如森林綠色。」他對西裝布料、剪裁及皮鞋款式的熟悉程度，確會令人眼前一亮。而每個訂做西裝的客人，平均也要上來三次包括選料及試身，跟客人混熟的機會也因此大增。「除咗行內知識，我仲會發掘各種酒同古董手錶同佢哋分享，大家就會愈傾愈多。」男人與男人之間，有時其實就是這樣簡單。
開業資料（ 06/2016）
按金：$80,000
租金：$40,000
存貨：$80,000
裝修：$100,000
其他雜費：$50,000
總投資：$350,000
#薪金包括兩名全職及兩名兼職
營業資料（ 02/2017）
營業額：$270,000
物料及造工成本：$135,000
租金：$40,000
薪金：$45,000#
雜費：$3,000
廣告：$17,000
盈利：$30,000
贊助咩人要識揀！
在人人也可成 KOL（ Key Opinion Leader）的年代，各大品牌也願豪送贊助品予坐擁成千上萬追蹤者的「女神」及「男神」，務求能在他們的社交平台上獲得一刻曝光。但小型的本土品牌在缺乏銀彈支持下，更應善用資源。「除咗送贊助品俾 KOL外， KOL會另收數百至過千元嘅『出鏡費』，先會影一張相貼上 Ig，而呢筆額外嘅錢，其實夠我送多對鞋俾真心會試著嘅人。」 Curtis主張鞋可以送，但要送得值。
• KOL感覺是賣廣告多於分享，描述產品的文字較千篇一律。
• KOL帖子獲讚的數目飄忽，難預計產品真正曝光率。
•贊助 KOL有一定風險，因他們的價值觀或取向或會影響品牌的形象，隨時正評變負評。
•主張送產品予該行專家試用，如 The Korner會送鞋給「鞋痴」，他們通常較具公信力，評價也較公道。
•另可贊助較實在及貼地的素人使用，可留意其獲讚數目是否平均，如每個帖子可獲得介乎一百至百五個讚好。
•素人非按照片張數收費，會願意多拍照片。他們普遍會試用產品多於只拍照了事，從而能提供用後建議予品牌，鞋子能被真正穿著走上街頭、獲得曝光的機會也大增。
撰文：黃綺敏
攝影、攝錄：廖健昌
ed_bn@nextdigital.com.hk
|
鍾意就快D Share啦！
|
|
|
