田蕊妮主動出手幫坤哥整理頭髮，「偽毒」坤哥暗爽！
探熱針
對住坤哥都未夠 麥明詩戲屎狂 NG 黑面田蕊妮忍唔住出手
視后田蕊妮演技有幾勁，大家淨係睇早排播完的《迷》，見佢對住坤哥（吳業坤）發晒狂逼對方走上天台跳樓一幕，已經睇得出什麼叫演技派。
由於戲好大台就繼續安排田蕊妮拍住班新人，指點他們做戲，在新劇《誇世代》，田蕊妮繼續要對住坤哥，加埋有「坤哥 2.0」麥明詩做對手戲，今次同麥明詩一樣係拍天台跳樓戲，睇吓田蕊妮點樣再發揮其「神級」演技！
坤哥 2.0
在劇集《迷》，田蕊妮（阿田）飾演的「 Cal姐」演技贏盡口碑，逼死坤哥跳樓一幕，網民都睇到拍爛手掌，要對住演技麻麻的坤哥（吳業坤）做對手戲，但竟然冇被對方拖累，依然發揮到神級演技，所以獲網民力捧她為今年視后大熱。
最近阿田再為大台五十周年台慶劇《誇世代》開工，今次除咗同歐陽震華（ Bobby）、陳豪視帝級人馬大鬥戲外，大台食過翻尋味，繼續安排阿田與一眾後輩做對手，包括舊拍檔坤哥、陳嘉寶（ Anjaylia），以及十優港姐麥明詩。
這部劇阿田同麥明詩有唔少對手戲，上週二（三月十四日），阿田就同陳嘉寶（ Anjaylia）、麥明詩等現身西環一大廈天台拍外景，同樣都係跳樓場口，今次主角就換來新丁麥明詩，現場所見，麥明詩一身睡衣 look，赤腳危企天台都毫無怯場，吊住威吔在石壆上行來行去， roll機前還興奮到拎住手機狂自拍，不過拍劇仲係半桶水嘅麥明詩， NG十幾次是常識吧！
黑面煙駁煙
NG十幾次都未拍得好，阿田個樣開始顯得有點不耐煩，孖住監製陳維冠企埋一邊雞啄唔斷傾偈兼手指指研究，其間仲煙駁煙係咁 chur，在旁的陳嘉寶慘食二手煙。
拍了差唔多兩個鐘導演都唔收貨，阿田忍唔住要出手指導，經阿田教完之後就順利完成！之後到阿田及其他演員拍攝面對墮樓的麥明詩反應，她再發揮其七情上面表情功力，成功帶領住陳嘉寶、安德尊等演員入戲。
當仔咁湊
另外，阿田同坤哥真係好有緣，坤哥好似寃魂般纏住唔放，今次他們都有不少對手戲，阿田繼續當他仔咁湊，上週四（三月十六日）二人現身西貢開工拍外景，同場仲有歐陽震華（ Bobby），當日阿田同坤哥更有情深擁抱場口，試位時，坤哥硬晒軚唔敢掂落阿田度，完全交唔到戲，她惟有即刻出動「溫柔之手」幫坤哥整理頭髮，又毫不避忌喺坤哥面前整理胸口，終於打破隔膜，到正式埋位坤哥肉緊攬實阿田，結果導演兩 take就
收貨！
對完一班戲屎新人，田蕊妮同番好戲之人張繼聰有對手戲，見到阿田個樣同對住坤哥、麥明詩個樣好唔同，雖然日接夜咁開工但依然笑容滿面，導演一嗌 roll機，阿田即時入戲，呢啲咪叫專業囉！
撰文、攝影、攝錄：娛樂組
|
鍾意就快D Share啦！
|
|
|
