煎 pang向傳媒指單文柔幫佢做形象，但當日本刊就拍到二人買傢俬，煎 pang認真好戲！
娛頭
一腳踏兩船 玩謝胡定欣 陳展鵬同港姐新歡買傢俬同居
陳展鵬在山頂與港姐新歡單文柔摸黑在車廂開餐，點知被撞破偷食事敗，由於證據不足，陳展鵬還理直氣壯解畫說，指新歡只是幫他搵衫做形象，當晚因中環餐廳滿座，惟有在車廂吃外賣。不過陳展鵬的連篇大話都呃唔到觀眾幾耐，本刊收到消息知道他瞞住正印胡定欣，與主動型新歡單文柔已經打得火熱，更發展到秘密同居關係，上週三（ 15/3）晚就全程直擊陳展鵬與新歡在九龍灣 MegaBox宜家甜蜜買傢俬，兩人更在暗角位攬腰拖手，以為咁就無人知……
擘大眼講大話
同新歡山頂偷食斷正，陳展鵬還解畫說單文柔是他的 stylist，當日是為他準備之後登台的服裝，為答謝對方才一起吃飯，向住傳媒擘大眼講大話，以為可以瞞天過海，呃到全港市民同呃埋胡定欣。
上年十月擔任港姐星級評判的陳展鵬，初次邂逅單文柔，當時已經𥄫中對方，跟住在公開活動重遇，便火速抄牌，到目前為止秘密拍拖接近兩個月，他們更已經發展到同居關係。
「因為煎 pang同父母一齊住，唔方便帶女返屋企，咁 Phoebe（單文柔）又係同屋企人住，所以煎 pang特登租咗地方俾佢住，等煎 pang可以方便上去過二人世界，同埋煎 pang咁小心，唔會成日同女仔去街，有自己私竇方便好多。」陳展鵬身邊人說。
上週三（ 15/3）晚上 9時，即山頂車廂偷食斷正前，陳展鵬瞞住胡定欣，與單文柔在九龍灣 MegaBox買傢俬，絕對不是他自己所說的，對方幫佢搵衫，當晚陳展鵬明顯怕俾人認出，戴晒帽同口罩十足偷情裝備，至於單文柔因為外形毫不起眼，所以在場無乜人留意到陳展鵬與新歡拍拖，二人在宜家一直黐到實睇嘢，相當甜蜜！
兩人先去揀窗簾，陳展鵬推住手推車，將揀好的窗簾及層板放好，兩人就企埋一邊，不停研究尺寸，女方不時一副冧樣望住男友，還突然拖住陳展鵬手臂發姣放電。
之後二人又轉去另一邊睇熨衫板，見到啲小型相架，單文柔又攞起幾件，行到暗角位，原本高度戒備的陳展鵬，始終抵受唔住單文柔姣功，當女方主動挨向他時，陳展鵬就伸手從後攬實女方條腰，親密關係即時現形。
是非港姐
26歲的單文柔（ Phoebe），身材 33-24.5-35.5，在倫敦藝術學院畢業，修讀布料設計，曾任造型指導工作，去年參選港姐進身 10強，當晚陳展鵬同胡定欣都是星級評判，最終三甲不入。
參選期間， Phoebe被指是非精，專黐大熱佳麗搞小圈子，經常擦工作人員鞋。不過令人最印象深刻是她出席港姐活動時，腋下出現大笪汗漬，場面尷尬。
落選後， Phoebe被安排入藝員訓練班，有指無綫原本有意安排她主持兒童節目《 think big天地》，但自從同陳展鵬傳緋聞後，網民一面倒圍插，即被高層照肺。
有車廂偷食癮
買齊東西後，兩人行去收銀處，陳展鵬付款後，他們將戰利品紮好，見陳展鵬努力將物件綁起，單文柔亦幫手攞嘢，絕對唔扮公主唔郁，難得深得男友寵愛，之後二人就去搭𨋢落停車場攞車，等𨋢期間手揸住窗簾棍的單文柔，冧到不時露出勝利笑容望實男友。
向來鍾意偷食𡃁妹的陳展鵬，多年來食女非常小心，很少會帶她們出街，今次一齊去 shopping實屬少見，不過他就有鋪鍾意在車廂邊食邊談心癮，去年在溝胡定欣期間都有用同樣的招數，載她到西貢然後在車上嗒糖水談情。
自從去年十月與胡定欣拍《同盟》正式撻着，由熒幕情侶變真情侶，當時陳展鵬就以事業剛起步，氹胡定欣將戀情低調。
「定欣好緊張呢段感情，佢根本唔知煎 pang咁花心！所以煎 pang話唔想公開戀情，佢都唔介意！」胡定欣友人說。
去年台慶頒獎禮，陳展鵬首奪視帝，胡定欣比自己攞獎還開心，兩人亦應記者要求錫錫，公然晒恩愛；當晚慶功宴甜到漏的胡定欣就負責找數，出埋錢幫男友慶祝，不過即使雙方父母都有份出席頒獎禮，當時被問到見晒家長的陳展鵬，還唔肯認愛更大耍太極說：「無做錯事，點解見家長！」毫無承擔。
帶定欣睇樓
事實上，定欣已一早融入陳家，不時會陪陳展鵬與陳媽媽食飯，而一直與父母同住維景灣畔的陳展鵬，見事業有起色，加上媽咪想他置業，近期經常陪陳媽媽四出睇樓，上月便有人目擊二人去大埔比華利山睇樓，他更帶埋女友胡定欣。
「煎 pang喺 TVB搵錢唔多，就算外邊登台收入都少定欣好多，不過定欣無介意男友無物業喺手，知男友想買樓，仲好支持佢，嗰次同埋陳媽媽去睇比華利山，煎 pang同定欣都好鍾意嗰度！」
不過今次偷食爆煲，被蒙在鼓裡的胡定欣，睇清男友真面目，嬲到同陳展鵬斬纜，更撇清關係，將對方降呢為同事，「大家喺公司工作就係同事！」大話冚大話，唔知煎 pang今次又有乜新藉口！
就展鵬新戀情，向陳媽媽查詢，一提單文柔是否同阿仔拍拖，陳媽媽即時否認：「唔係！我話俾你知，男女朋友實有嘅！佢係一個藝人嚟，佢都要生活嘅！」
相反，記者再追問陳展鵬與胡定欣拍拖一事，陳媽媽卻好有保留：「唔知！無可奉告！」
食女無數
有「雜食王」封號的陳展鵬，吃盡不少花旦同二打六姐仔，總之但求就手專向同劇拍檔埋手。
馬蘇
早在亞視年代，陳展鵬拍《愛在有情天》時，同內地女星馬蘇撻着，當時女方同國家乒乓球隊孔令輝拍拖，但陳展鵬一於少理，擺明撬牆腳。
傅嘉莉
拍《張保仔》期間，原本陳展鵬先睇中港姐陳凱琳，點知人哋唔受溝，於是陳展鵬轉移向另一女演員傅嘉莉埋手，經常出雙入對，在橫店拍外景時，二人經常離隊，齊齊匿埋在酒店沒有外出。
鍾嘉欣
陳展鵬同鍾嘉欣連拍兩套劇《大藥坊》、《巨輪 2》後傳出緋聞， 13年 10月，陳展鵬揸跑車接載鍾嘉欣時在上環撞車，鍾嘉欣慌張逃離現場，令戀情曝光。
蔡思貝
15年 11月，陳展鵬被斷正揸住蔡思貝坐駕至九龍城車房，兩人更身貼身驗車，之後直駛蔡思貝位於將軍澳寓所短聚。
攝影：陳亦龍、蕭敬漁、李溢敏、吳斯金、張景然
|
鍾意就快D Share啦！
|
|
|
