吳宗權有別於兩位表哥及表弟，按中國人的傳統跟父親吳光正姓吳。
中環人語
包 Sir爆肌外孫彈出
已故船王包 Sir外孫吳宗權熱愛運動，其「爆肌」身形睇到唔少女士眼擎擎，近日包 Sir另一外孫乘勢彈出，為推廣其大坑 Boutique酒店—— Little Tai Hang而拋個身出嚟，嘩，呢位包 Sir三女包陪麗與日籍丈夫 Watari Shinichiro所生嘅 Tommy Watari Pao，中文名叫包建雄（跟外公姓包）， Tommy仔好 casual穿上 T shirt一件、穿窿牛仔褲一條，已盡顯其健碩身材，平日一定勤操，一啲都唔輸蝕俾表哥吳宗權；相信是城中另一炙手可熱鑽石王老五；包 Sir另一個孫 Andreas Sohmen- Pao仲把炮，○八年以三十七歲之齡成為香港滙豐銀行非執董，可見包 Sir與獅子銀行關係幾咁深厚，所以話跟外公姓又點話呢？
睇唔出林鄭死阿媽
林鄭「好打得」呢個朵，源自佢出任發展局局長之時，當時林鄭都非常「入戲」，將呢個朵發揮得淋漓盡致，即使死阿媽，都依然「 work hard」，話說林鄭阿媽林鳳蘭，二○一○年二月廿二日在將軍澳靈實寧養院過身，隔咗一日，即二月廿四日林鄭已經開工，以發展局局長身份出席市建局重建馬頭圍道之記者會，沒露半點愁容，官場中人當日話完全睇唔出佢死阿媽，非常「硬淨」，連喪母哀傷之情感都可以暫且拋開！
中環寸嘴 豉油王好彩姓王
呢排人人 talk馬會，都要出席吓旗下活動，上週五沙田有「扑馬」——馬匹拍賣活動，即管去坐吓，不過都係啲馬會忠實擁躉先去「扑」嘅啫，免俾練馬師食價嘛，我見到朋友啲仔女養馬，我焗住同人夾份做埋馬主陪跑，都要掛住個馬主牌，揈吓揈吓咁。
週日寶馬打吡大賽，喺馬場撞到同珍醬園太子爺 Jimmy（王賜豪），佢話：「吖，點解今期寫我老豆（同珍醬園老闆王仲銘）。」豉油王——王仲銘同我老豆一齊闖蕩江湖，我仲記得喺老豆靈堂上，掛住豉油王對輓聯，寫住「你我任中華」，以為咩大中華，其實係中華酒樓夜總會，真係唔識俾佢嚇死，識就笑死，以前年年會送啲豉油同埋嘉應子俾我哋，叫我哋「嗒」清楚，吩咐指明係頭抽，老豆話齋好有「飛士」，仲話如果個個咁送法，一年慳唔少，我亦「優化」老豆庭訓，得閒攞唔少「 sample」試用試食，所以我大有資格做代理，無計，呢啲職業病，豉油王都好鬼有腦筋，樂善堂揸旗時，打完仗之後將善長捐出嚟嘅地皮、舊樓重建再出租，將租金俾樂善堂營運，所以話樂善堂唔使揼人心口都搞得掂，老實講，豉油王精髓亦係醬園變地產，反而醬油變咗副業，好彩佢姓王，家陣仍稱得上「豉油王」。
孫仔較勁 郭老太老懷安慰
前新地聯席主席郭炳江重獲自由後，未有參與公司業務，不過阿仔郭基煇（ Adam）對老父親自領軍投來的上海徐家匯項目十分上心，這幅上海地王是郭炳江一三年以二百七十六億投得的，聽講 Adam好想參與此項目的規劃；仲想住宅比例佔多些，話晒阿媽梁潔芹坐鎮建築部，梗係想帶住囝囝做嘢，然而郭炳江服刑後，公司由叔仔郭炳聯揸弗，在規劃上傾向以商業為主；咁郭炳聯囝囝郭基泓（ Christopher）主理國內商用物業銷售、管理及租務，咁又有發揮機會喎，新地第三代如此投入，爭住為家族效力，唔會話咬住牙籤印印腳做少爺仔，郭老太老懷安慰。
|
鍾意就快D Share啦！
|
|
|
