陳瀅放狗，有左右護法幫手拖狗，架勢到呢！
娛樂偵訊
溝有錢仔連環撻 Q 陳瀅帶兩兵出巡拖狗
大台小花陳瀅，去年中同四太仔何猷亨半年情玩完後，被傳媒踢爆她暗撻「九肚山方力申」劉德俊，戀情見光冇下文，又如何！有名你叫女神， Jeannie（陳之洋名）根本不愁寂寞。就以近日無事忙為例，到淺水灣放狗，好姊妹劉佩玥、何雁詩忙開工，就有凸腩王祖藍（紅衫）同嫩版徐榮（藍衫）做左右護法，一人拖一隻愛犬，緊隨其後，儼如女王出巡一樣，收兵應用大法，陳瀅最有心得！
女王出巡
下午三時多，化行妝的陳瀅，黑超都懶戴，大搖大擺由左右護法分別拖住兩隻寶貝狗 Diesel同 Baymax的陪同下現身商場，驟眼看勁有女王出巡的氣勢。行了兩個圈， Jeannie決定在商場外的餐廳落腳。左右護法繼續緊守崗位，品字形夾實陪坐，至於 Jeannie當正餐廳梳化如貴妃椅一樣，在愛犬的陪同下半躺坐着。 Jeannie全程篤手機，完全當左右護法透明，反而兩男周不時有偈傾，其間還商量叫哪一款下午茶。
食到七七八八、 Jeannie示意嫩口徐榮傍實外出，並示意凸腩祖藍好好睇實愛犬。原來女神要用手機影相留念，隔一陣又返回餐廳，拎出傻瓜機着嫩口徐榮操刀影產品合照，估計是交功課，上載社交網站之用。過目完對方所拍的照片， Jeannie一手將手機交到對方手上，便一支箭標入餐廳，完全將使人使到盡發揮得淋漓盡致！
三人百無聊賴坐多個半鐘才離開。 Jeannie繼續女王本色先行去攞車，緊隨其後的左右護法安頓好兩隻愛犬上車，凸腩祖藍便自動波離開。無計啦，女王坐駕只得兩個座位，又不及嫩版徐榮有得陪影相，唔想失去做兵嘅機會，梗係要識做！
見光死
同四太仔何猷亨拍拖其間，陳瀅有機會進駐九龍站君臨天下豪宅，隨着兩人半年情玩完， Jeannie孖住何雁詩搬到大埔，有指為了方便見有米新歡「九肚山方力申」劉德俊，可惜戀情十畫未有一撇，隨住見光玩完。「就係俾傳媒影到，知道對方有個女， Jeannie係聰明人，梗係即閃啦，況且呢啲兵佢身邊大把，開句聲隨時有人買外賣，陪放狗，根本唔急住要拍拖！」陳瀅身邊人說。
撰文、攝影、攝錄：娛樂組
|
鍾意就快D Share啦！
|
|
|
