出爐金像獎影帝影后林家棟惠英紅到後台接受訪問，惠英紅見到林家棟即刻話﹕「我支持你！」林家棟更咀出爐男配曾志偉個嘴，惠英紅都有鍚佢一啖，志偉即鬧家棟：「粉腸！」急急抹嘴。剛才小紅姐在台上講得獎感受時，情辭動人，一念及亡母，更是淚如下，兩度謂「我冇丟到姓惠嘅架！」又感謂上次金像獎得獎時，父親離世；今次得獎前數月母親又離世，小紅在台上痛哭謂：「我希望可以有屋企人同我分享下！」小紅在後台受訪時謂：「一路有人問我，係咪好緊張好緊張，我就叫大家唔好問。我自己有個心願，如果唔係媽咪早幾個月過咗身，我唔會有呢個心願，我好想攞呢個獎畀佢睇，我真係為咗佢做咗一啲嘢係畀社會嘅，希望佢會明白。我從未諗過今日會攞獎，如真係攞獎就講台上嘅說話，唔係刻意去催淚，好抱歉剛才係台上面失儀、失態，想同所有朋友講聲唔好意思。自己做新人時好多人幫過我，現在如遇好電影，唔理係咪片酬好低，封利是都好，但只要好電影我就會支持。」影帝林家棟就話：「咁多年嚟好多人睇住我大，出到嚟得到好多人嘅鼓勵，香港人最叻就係追夢，有夢就不妨去追，好開心大家俾我有呢個機會。其實最重要就係要一個好劇本，冇呢個劇本就唔會做到呢樣嘢。」至於最佳男配角曾志偉，喺後台開心得跳起五次。對於曾國祥未能奪得獎最佳導演，是否美中不足？志偉稱：「其實都開心0架喇，不過知道佢攞唔到都有少少美中不足，爭少少，不過佢仲後生，遲啲攞都唔緊要。」
| 攝影：葉君海、陳慧安、仇志德、陳順禎 | | |
| | | |
| | | |
| |
|
鍾意就快D Share啦！
|
|
|