「烏卒卒好似好似一隻黑蟋蟀，烏卒卒隨時施法術」一聽到呢首歌，90年代嘅集體回憶出晒嚟，因為呢首歌大家都一定耳熟能詳，咪就係陳松伶（松松姐姐）嘅代表作囉，到你家仲係大家心目中嘅經典兒歌之一呀！松松姐姐唔單只唱兒歌，佢仲演出過無數經典電視作品如《天涯歌女》、《月兒彎彎照九州》、《金裝四大才子》等同樣令人留下深刻印象，所以唔少觀眾都話係睇佢嘅電視劇長大㗎，可想而知松松姐姐係幾有代表性。大家要留意喇，皆因闊別十年，松松姐姐再為無綫拍攝新劇《全職沒女》，今晚就會再現幕前，網友都大呼超期待，仲話有佢就係信心嘅保證，諗唔到咩理由唔追呀！
回顧昔日經典作品
而無綫myTV SUPER專頁，就集合咗一段松松姐姐昔日經典作品嘅短片，畀大家回顧吓先，當中除咗佢嘅角色令人懷念外，佢合作嘅男演員一樣都係咁吸引，因為全部都係大家心目中嘅男神，有邊個？咪就有天王黎明（Leon）、鄭伊健、古天樂、仲有影帝林家棟，真係粒粒皆星，個個都係型男兼實力派演員。1989年松松姐姐同Leon合作嘅作品《天涯歌女》，二人喺劇中不時合唱，令觀眾一飽耳福，唔少網友都大讚佢哋嘅歌聲，令人聽出耳油，仲話好希望二人有機會再度合作呀！到1991年同鄭伊健嘅《月兒彎彎照九州》同樣令人讚賞不已，紮起孖辮嘅佢青春可人，網友都話松松姐姐形象非常清純，真係仙氣十足，係大家嘅女神。
阿梅妝容演沒女
隨後嘅《92鍾無艷》、《金裝四大才子》到後期嘅時裝劇《大澳的天空》一樣咁精彩，松松姐姐嘅演出同樣令人拍爛手掌，個個網友都大讚佢無論演咩劇都得心應手，仲要咩造型都係咁靚，認真厲害呀！而今次46歲嘅松松姐姐喺新劇《全職沒女》，就以傻大姐形象示人，喺劇中為愛情不知可以去到幾盡，片中仲見到佢有《少林足球》嘅阿梅妝容，嘩！咁精彩，難怪網友都話好期待松松姐姐今次相隔十年嘅作品，仲話一定會有驚喜帶畀大家，好期待！另外，仲有網友大讚松松姐姐十年如一，係凍齡美女，靚爆鏡！
網民有話兒：
BBXX FSXX：好掛住松松姐姐嘅演出，佢就係信心嘅保證！
GGCXX CXXX：真係睇佢嘅電視劇長大口㗎！
DXXPXX：佢同Leon嘅合唱，令人難以忘記。
JXXXX：松松姐姐形象非常清純，仙氣女神。
RXX TXX：松松姐姐咁多年都冇變過，靚爆鏡呀！
|
鍾意就快D Share啦！
|
|
|
