鍾楚紅話想買四合院！
鍾楚紅（紅姑）現身Chaumet在北京舉行的Chaumet World派對，現場展出品牌經典作品，紅姑戴上品牌逾五百六十萬的首飾示人，期間她與荷里活「蜘蛛女」姬絲汀鄧絲（Kirsten Dunst）齊齊欣常工匠鑲嵌鑽石，並交流心得。
去打書釘
紅姑稱會在北京逗留三日，明天便離開，問她會到甚麼地方遊覽？她說：「我啱啱聽到人講北京有間好靚嘅書局，我想去打書釘，同埋會去頤和園，依家玉蘭開花，我想睇花，不過唔係好夠時間。以前我會去琉璃廠街同行胡同，我好鍾意四合院，當年差啲買咗，如果當年買到就發達。（點解冇買？）因為有好多條例，唔係咁簡單就可以買。我每次見到四合院就流口水，依家好多四合院改建成餐廳之類，如果真係買到，我會用嚟自住，中間一個花園，好開心。」紅姑稱北京的天氣比想像中好，她還看到櫻花，但就沒有帶相機，只用電話拍下美景。
自認有眼光
紅姑提到喜歡在內地購買字畫，她稱不少博物館也附有店鋪售賣民間收回來的珍品，她自豪地說：「我買過好有名望畫家嘅作品，仲有清朝皇帝嘅真迹。（有邊位名畫家作品？）趙少昂，不過當年買好平，但升唔升值唔關我事，我唔會賣。（要好多地方收藏？）啲畫要表起佢，但我冇掛出嚟，如果係要掛喺茶居同埋配合酸枝花梨傢私先至啱。（多唔多收藏品？）唔係好多但都唔少，但唔係多到可以開展覽，而且我都唔敢，我收藏係自己開心，唔係畀人睇。（有冇朋友叫你割愛？）都有，但我唔會賣，所以全屋都係嘢，都唔知點算。（你係咪好有眼光？）我得一對眼，但都幾proud of自己，我唔係當投資，只係自己鍾意。我成日都去博物館，好鍾意藝術，喺藝術方面跟得幾貼，比時裝跟得更貼。」
來源 source: http://hk.on.cc
|
鍾意就快D Share啦！
|
|
|
