位於深水埗嘅西九龍中心，雖然只係一個小小嘅平民商場，但佢嘅人氣分分鐘勁過啲大型高檔商場！事關商場嘅9樓，有一架全港獨有嘅室內過過山車－天龍過山車。呢架過山車喺1994年開幕，直到2003年停駛。停駛14年，佢嘅傳聞一直都冇停過，一時又話佢會拆，一時又話會重開；而停駛原因更加係一個謎…究竟係咪因為死過人要停，又係咪因為過山車要留畀「阿飄」坐，所以要停而不拆呢？想360°感受一吓呢架天龍過山車極速感動？只要點擊以下《蘋果VR》網址：
http://bit.ly/2ov0p1n其實呢架Made in Italy 嘅天龍過山車，圍繞商場嘅8樓同9樓，全程254米，最高時速可以去到每小時25公里。由94年開幕至03年停駛，超過200萬人次搭過，當時只要畀15蚊就可以坐足3轉。想當年有唔少名人﹑藝人都坐過，包括謝霆鋒﹑黎明﹑鄧麗欣等。就連大台劇>都曾經喺度取景，認真巴閉！車上嘅安全帶由Day 1已經有，並非好似網上傳聞所講，因為有人拗過出車外先至加設嘅。至於被誤以為係救生網嘅網，其實只係為防萬一有嘢跌落嚟去接住物件嘅啫。一直流傳嘅鬧鬼傳聞，西九龍中心嘅公關向我地證實，當年鑑於美國有室內過山車發生意外，高層考慮過安全問題後先決定停駛，而絕對唔係因為死過人，佢亦再三強調天龍過山車運作期間，從冇發生過意外。至於曾經有網民目睹過山車「自己郁」，公關表示過山車仍然有機電署發出嘅牌照，商場每星期都會有專人做例行檢查，而隔一段時間更加會進行拯救演習o添。天龍過山車係唔少8﹑90後嘅集體回憶，唔少人都好想佢可以重開。不過商場方面就賣關子，話唔知會唔會重開，但如果街坊嘅聲音夠熱烈，能夠撼動管理層嘅話，話唔定會重開喎！電腦用戶可選用Google Chrome瀏覽器，以滑鼠或方向鍵上下左右移動，360°欣賞片段。
手機讀者，可率先下載全新《蘋果VR》程式，立即體驗壹傳媒集團旗下製作之所有360°影片及VR互動資訊：
iOS: http://bit.ly/ADVR_iOS
Android: http://bit.ly/ADVR_Android
文﹑採：植詠珊(Cathy)
攝影：Teddy﹑恆
剪接：Roy
編審：Kaman
|
鍾意就快D Share啦！
|
|
|