現年35歲嘅曾國猷（Mark），係曾志偉同現任太太宋麗華所生嘅細仔，亦即係曾國祥胞弟。Mark外形同爸爸極相似，而佢對演藝圈工作甚為有興趣，仲做過張學友助手。而曾志偉對囝囝非常愛鍚，出心出力撑阿仔，包括最近Mark同梁芷珮（Christy）為大台拍攝旅遊節目《超級台灣任務》，志偉亦有出面力撐。不過《蘋果》最近獲得消息，Mark涉捲入「走數事件」，有指佢舊年同韓藉拍檔合資公司81TV，於啟德郵輪碼頭舉行《Listen To Your Eyes》Music Party不但爛尾收場，而且仲有「手尾」，有公關公司、贊助及投資方，齊聲指控Mark令他們蒙受金錢或聲譽損失，總額高達200多萬。本報聯絡到幾位涉事當事人，三位分別來自兩間公關公司及負責音樂會工程代表，各人異口同聲表示，希望Mark站出來做一個負責任的人。該音樂會原定去年1月23日在啟德郵輪碼頭舉行，演出嘉賓包括有韓國女團Girl's Day、Dear Jane、Supper Moment及24Herbs，門票分為980元及580元。不過，音樂會一拖再拖，而Girl's Day一月來港演出，最後變成出席記者會，其後音樂會宣佈改期至同年5月28日，但至5月24日又宣佈取消，主辦單位當時聲稱是政府增加額外牌照條件所致，惟食環署及消防處之後回應指控，均強調根據既有程序規定處理申請。根據資料紀錄，名為「81TV LIMITED」主辦公司成立於2015年9月，股東共有12位，大股東3位，當中包括曾國猷及名字併音為Yoon,Joon Ho嘅韓藉男，而曾國猷則於去年12月1日退股。而本報獲得一份音樂會嘅資料文件，當中有關81TV嘅資料中註明「Mark Tsang」係公司CEO，並寫上「Son of Eric Tsang(曾志偉)」。自稱有份負責該音樂會工程嘅阿聯向《蘋果》講及事件，表示：「2015年11月尾左右，一個合作咗好耐嘅單位（公關）揾我幫手做，但舊年1月突然話取消改5月做，後來個騷直頭停咗，但因為嗰時所有嘢都已經做晒，需要嘅嘢都book好晒，人手、器材所有嘢都book咗，係要俾錢，我就每個月俾人追數，但到呢刻都係未有消息。」阿聯嘆謂，這行好多人手停口停，20萬有啲人可能係小數目，但對好多人嚟講好重要，希望有關人等現身交代。同樣自稱受影響嘅公關公司負責人Patrick就話：「呢個騷都係一個朋友揾我幫手做台、燈、聲同rundown，因為朋友揾，加上聽到係曾志偉個仔都放心做，但之後收咗支票又叫我哋唔好入，都知道有問題，最終都係由2月delay到5月，期間不停都有追佢哋想點做，因為好多程序都要做，到5月頭佢哋話可以搞，但最後係取消，我哋問番佢啲票（支票），差唔多每兩個星期追一次都冇用，成日話有啲新嘢傾近，我哋已經話要採取法律行動或者同傳媒講，但每次都叫我哋唔好同傳媒講，如果唔係搞到大家都收唔到錢。」另一公關公司嘅負責人梁先生，就話今次事件對佢公司聲譽好大影響，因為其公司負責幫Mark揾贊助及投資者，涉及金額達200萬：「大約有三個贊助，大部份Mark都有親自開會，其中有一間韓國汽車公司，都係攞唔返錢，自己都要同呢啲公司交待。」梁先生謂，客人血本無歸，自己都想出來幫佢地揾番個公道，200萬包括約20萬贊助，其他係投資者攞出嚟嘅錢。梁先生又表示贊助客戶已打算用法律途徑處理，並希望當日負責接洽嘅Mark交待：「當日係Mark出面傾嘢，依家話同呢間公司無關，真係好無奈，最重要保持公司聲譽好想尋求解決方法。」
|
鍾意就快D Share啦！
|
|
|