曾經拍過唔少周星馳電影嘅一班綠葉，好似「如花」李健仁、「甜筒輝」鄭文輝、「細龜」黃一山，以及喺《少林足球》度飾演欷歔豬肉佬嘅楊能，原來嚟緊8月會幫ViuTV主持一個遊戲節目《街頭派錢黨》，佢哋會喺香港大街小巷同市民玩遊戲，每次挑戰成功，市民可以獲得現金1,000蚊，就算失敗市民都會有一個紀念金幣，預計每次出動會即場派5,000蚊至10,000萬不等。細龜離開咗香港電視圈10幾年再次回歸，今日問點解返嚟做電視，佢透過微信回覆：「因為佢肯俾錢，我哋要賺錢吖嘛。另一方面話個節目可以自由發揮，冇乜稿，我最鍾意冇乜稿，唔使記咁多台詞，又可以派錢俾啲觀眾，要考吓佢哋（觀眾）嘅，咁過到關就俾1,000蚊，相信觀眾會好開心，我哋又可以帶歡樂俾觀眾。」細龜又話好多時返香港，啲市民都話好耐冇見佢，所以返嚟見吓觀眾。細龜仲講笑話：「第一證明自己仲未死，第二證明自己仲拍得嘢，畢竟我喺香港長大，希望可以重溫番當年開心嘅嘢。今次係如花（李健仁）牽頭，所以亦都要多謝如花，可以聚集埋我哋一齊拍番個電視節目俾香港觀眾睇。」
來源 source: http://s.nextmedia.com
|
鍾意就快D Share啦！
|
|
|