Penny五年來接了三十多個裝修個案，遇過不少麻煩客，他直言：「跟少日個客都會係咁打嚟，完工間屋有咩事都要即刻飛車過去，都好困身㗎！」
壹盤生意
對抗納米樓 靠石膏板間房 玩懸浮提升空間感
近年發展商不斷推出俗稱劏房盤的納米單位，吸引一眾心急上車的年輕人，發展商賺盡之外，連帶裝修相關行業商機處處。
三十一歲的劉志衡（ Penny），家族經營裝修行業多年，坦言「由細到大好憎呢行」，但因近年劏房盤湧現，令他對設計產生興趣，在五年前更決定自立門戶，成立 PL Interior Design，專幫一眾年輕人設計細單位。
Penny的公司至今已接獲三十多單生意，最擅長是用多種方法，解決劏房盤各種問題。但他就指，近年建築工人薪金颷升，加上遇到不少麻煩客人，都對他的生意構成壓力，他又如何拆解？
Penny接受訪問後，立即帶記者到完工的單位訪問。其中一間「成名作」，就是位於荃灣中心、實用面積三百七十七呎的單位，由一對母子居住。兒子 Elvan就指：「一入到嚟已經好殘舊，畢竟呢度都好多年。」最後用了二十多萬，將客廳打造成連酒吧的空間：「我自己同媽咪嘅朋友，都覺得好似酒店式。我有時都會請朋友上嚟飲酒，播放啲音樂，真係已經好似酒吧一樣。」
記者見單位以白灰色為主調，牆身用上各種花紋。特別之處莫過於客廳裝上大型酒櫃及吧枱，而吧枱內原來是用來放鞋，一物二用。 Elvan更笑指日後結婚，都會搵 Penny設計家居。
近年二手樓市冰封，新樓的裝修成為各設計公司的主要「戰場」，一眾設計師都要想盡辦法搶佔年輕客人市場。 Penny本身家中從事裝修行業，中學畢業後就跟隨父親到工場。他坦言一開始「覺得工場好污糟，成日都想離開呢行，一開始完全無好感。」但他愈做愈感興趣，加上身邊不少朋友都開始成家立室，不少都搬進劏房盤找他裝修，於是他五年前決定修讀設計課程，再自立門戶：「嗰時老豆無咗我幫手都有啲失望，但係佢做熟客多，年紀都有番咁上下，我自己就想做年輕客人多啲。」
開店即遇麻煩客
由於 Penny多年來都是在工地埋頭苦幹，當獨立出來面對客人，少不免經常「撞板」。他指公司創辦不久就遇上麻煩客人：「成個工程一路都無問題，但去到臨完工，收尾數時，佢會提出好多普通客人唔會要求嘅問題，例如磚與磚之間嗰條縫嘅顏色，唔係百分百佢所想，唔想俾剩餘費用。之後我同爹哋傾，佢就話個客同你講咁多嘢，都係想你俾優惠。」他心灰道：「你對人好，都唔係個個客可行……」
兩招吸劏房盤客
Penny續指，為了吸納更多年輕客人，除了在 Facebook宣傳之外，更與賣樓 app合作，希望「買樓裝修」一條龍。現時公司有一半生意都是四百呎以下的單位，由於年輕人購買劏房盤比例愈來愈多，他表示：「好多二百至三百呎嘅單位，屋主都想好似住喺四、五百呎單位一樣。」他經驗所得，有兩招在他設計中經常使用。
招數一：石膏板砌臨時房
近年石膏板被視為建築業界「恩物」，因為裝嵌較傳統磚牆容易，加上厚度較薄、可隔音、防火，施工期較短，適合用在劏房盤中間房， Penny表示：「有啲客住兩年就走，可以用嚟間房，因為佢唔似傳統磚牆要做批盪，泥水係要用時間乾，一個單位去計，砌磚連人工大約一至兩萬，石膏板就可以平一半或以上。」他表示，現時大部分細單位都用上石膏板，而這材料可自行剪裁合適的大小：「依家假天花都會用到，當然無磚咁耐用。」
招數二：玩懸浮加空間感
傳統櫃枱都是以座地為主， Penny稱沒有變化之餘，放在細單位上更見侷促，所以近年就興起懸浮設計：「由地下度上嚟，六至八吋左右，令到整體空間感擴闊，喺櫃底就會安裝 LED燈。」而有新興的床亦用上懸浮技術：「承托係可以嘅，視乎自己的體重，張床雖然係懸浮，但佢都有承托腳架。」
不斷加薪留員工
二十六歲就開設自己的公司，難免被一眾前輩級工人看低，他就指創業初期聽過不少冷言冷語：「比起老師傅，我真係算一個初哥，佢哋經驗豐富，我不時都會到單位監工，我就試過提吓啲師傅點做，佢就話呢啲嘢我梗係知，唔使你去提！甚至臨施工時話唔做，我都試過。」他就「點都要忍」：「當同佢哋關係打得好嘅時候，所有問題都能夠解決。」
Penny的設計公司雖然已上了軌道，但仍要面對員工問題，因近年建造業界不斷加薪，自己都要用各種方法留住員工：「成日都要花心思去了解佢哋情況，或者多啲同佢哋聚會，留住佢哋嘅心，希望佢哋唔好轉工，因為出面都俾好高人工，起碼成二千蚊一日，令我哋做小生意嘅都非常困難。」
Penny打算在今年內結婚，雖然工作期間經常接觸劏房盤，但他直言沒有買該類單位打算：「唔會考慮啦""我想組織一個家庭，可能有兩三個小朋友，我驚唔夠住。」
創業錦囊 設計公司易賺錢？
做了十多年裝修的 Penny就指，現時行內缺乏新人，導致人工不斷上升：「即使乜都唔識，新人入行已經有六、七百蚊一日，做到半年左右就會加人工，一加都係加五十蚊左右，如果醒目嘅話五年就做到判頭。」
現時裝修及設計公司如雨後春筍，加上不少公司只以網店發展，令競爭更加激烈：「如果出嚟做判頭，生意就逐單計，一單小工程幾千至一萬不等，但最主要都係要打好關係，同埋手工及售後服務係非常重要。」
至於有不少設計師獨立出來開公司，他就指與三行出身各有利弊：「設計師畫圖、對客經驗就會多啲，但喺報價方面，就要好小心，如果三行出身嘅話，呢方面問題會少啲。」
開業資料(5/2012)
租金：$120,000
裝修設計：$80,000
雜費：$50,000
工具及材料：$100,000
總計：$350,000
（二按一上）
營業資料(4/2017*)
營業額：$375,000
人工＃：$150,000
工程用料：$40,000
訂造傢俬：$100,000
雜費：$5,000
盈利：$80,000
*工程以每單計算，此為按月比例
＃七名散工
撰文：梁延宇
攝影：梁正平
ed_bn@nextdigital.com.hk
|
鍾意就快D Share啦！
|
|
|
