開業初期他在觀塘租了千呎寫字樓，合共五個拍檔。
娛樂偵訊
身兼三職 狄易達食住《安樂蝸》大搞裝修配對平台
28歲的狄易達，既是藝人，又開跳舞學校！三十未出頭已經成功創業。有計的他最近食住代表作節目《安樂蝸》的人脈，搞設計裝修配對平台 Spaceplan，真真正正幫人打造安樂窩。
做邊瓣就要搬出邊瓣專業，對住鏡頭總是扎扎跳的狄易達，今日坐定定同你講生意經。
做節目見證爛尾裝修
狄易達主持 J2台的《安樂蝸》七年，見證唔少鏡頭後業主曾因裝修爛尾的申訴，同時又認識不少有質素的設計師及裝修師傅，人脈網絡及市場空間觸發他的商機，決定孖幾個拍檔開裝修配對公司。「做呢個節目，令我同一班好嘅設計師、裝修熟咗。我睇過市場統計，單係一五年香港做家居設計裝修，就用咗三百幾億，計埋 office、工廈係五百幾億。
望做同行龍頭
「若可以做到呢類平台嘅龍頭，只佔兩個%，已經係一個大金額。其實裝修好似結婚一樣，一生人可能經歷一或兩次，加上好多時業主同裝修一方有咁多拗撬，呢個統籌顧問好緊要，有得做。我嘅班底集齊設計、裝修及會計經驗嘅人，可以為客人及裝修兩家取得平衡判斷。依家有啲新樓客，最開心係有連鎖式大公司都搵我哋。」坐在辦公室，二十八歲的狄易達唔係單靠明星效應搵飯食，開口埋口都是一堆做足功課的統計數字，已有天使投資基金助創業，他現極積再搵投資者擴充業務。
用服務取勝光環
新生意投資六位數字，開業四個月，預計九個月後可回本。一身兼三職，狄易達日瞓三、四粒鐘。拍攝當日，客人余先生上門幫襯。問他是否因狄易達之名而來，他說：「我上網搵到呢間公司時，唔係因狄易達個名幫襯，而係 buy呢個平台理念。我要搞裝修，但工作繁忙冇時間跟進，我需要有人幫我搵唔同設計裝修格價比較，佢哋（狄易達）角色獨立，又幫我跟進埋，收費又合理。」
阿 Bob敲門
藝人身份做生意，有辣有唔辣，狄易達要服務取勝光環。「我嘅身份有時令我幾尷尬。係，明星效應可能幫到少少，但坦白講我呢個唔係簡單買賣，而係一個時期幾長嘅服務，所以做好服務係最重要。」有否因利乘便，做埋藝人客，遇過裝修爛尾的王祖藍有冇向他求救？
他說：「祖藍冇，有其他藝人搵我俾意見，其中有阿 Bob！」
收費設上限
狄易達強調，若服務配對不成功，是絕不收費。近日他們再定新收費，成功的話會分兩部分，第一是收設計公司的劃一會員費，第二部分是監工服務，如統籌角色，會在第一期向客人收取 3-5%（整個裝修工程費用計算），視乎裝修工程及跟進有幾複雜。而收費亦設上限，每宗交易不會超過二萬五千元。
有風險
狄易達說：「試過傾好晒，最後埋班時客人自己聯絡個設計師，又或者設計師飛咗我哋嗰部分。其實呢個問題 day one開始已經諗到，但行行都有灰色地帶。最重要係我哋呢個平台點樣提供更好嘅顧問服務，多於我哋顧慮點樣唔俾佢哋走灰色地帶。」
撰文、攝影、攝錄：娛樂組
|
鍾意就快D Share啦！
|
|
|