既然係 K后， Apple姐在大廳亦裝有卡拉 OK設備，方便二人在家唱 K！
名人動態
搬愛巢明年結婚 Apple姐坐麥德羅烈火戰車炒車
九一年搞 Big Echo，全盛時期試過有十八間連鎖卡拉 OK店的 K后 Apple姐（劉麗萍），經歷過離婚，店鋪全線結業，走過高低起跌，去年 Big Echo卡拉 OK再重開，事業有轉機，與初戀男友麥德羅愛情得意，決定明年拉埋天窗，四個月前， Apple姐與麥德羅搬入沙田名城千多呎新愛巢，她坦言同居生活需要磨合，「有開心有唔開心！我以前習慣咗自己霸晒成張床，一齊住需要互相遷就！」
要轉方向
一直住開沙田名城的 Apple姐（劉麗萍），四個月前搬入唔同座數的新居，住得好好哋，為什麼會搬？
「我信密宗，一位師兄同我講，二○一八年係要轉方向，搬去唔同座數，之前我係住向北，呢度向東南，都搵咗一排，好彩搵到呢度咁靚，加上我個人比較心急，過年時唔知係咪買早咗棵桃花，我覺得開得唔係咁靚，我就形住，唔知係咪舊居啲氣已經用盡，所以都決定早啲搬！」 Apple姐說。
新居設計由 Apple姐負責，她形容男友麥德羅好慳儉，就算啲嘢幾舊都唔捨得掉，衫又多，因此間屋除了三間 storeroom，還再將原先三間廁所嘅其中一間改成雜物房，加上全屋做了不少隱藏櫃，有足夠空間放嘢。
麥德羅表示，「搬一次屋好辛苦，但可以將啲垃圾掉咗佢都係好事。」但 Apple姐卻反駁他：「好難嘞！我掉唔到你啲嘢。」兩人大耍花槍！
唔記得沖廁
兩人相處要互相遷就， Apple姐話以前自己早瞓，而家因為生意較忙，兩人變成可以一齊夜瞓。
麥德羅更表示自己成日唔記得沖廁，亦學習緊要喺適當時間先講嘢，怕激親女友，「好似佢拜緊神我唔敢出聲！」但係 Apple姐就玩踢爆，她表示：「我希望唔好將公司啲嘢帶返屋企，但佢鍾意喺我瞓覺時，或者刷緊牙時講嘢，我會唔答佢！」
同麥德羅的關係既係未婚夫，又係公司旗下藝人，但 Apple姐就講到明會公私分明，她說：「雖然佢係我 artists，但我會叫其他同事幫佢，我亦會公平啲，唔會將資源只放喺佢度！」
而 Apple姐更大讚男友有一大優點，「佢激嬲我，佢肯認衰！佢會話對唔住囉，你知我又唔係咁醒！」五十九歲麥德羅，果然識氹人。
撞電單車受傷
多年來，麥德羅愛揸電單車，難得女友 Apple姐對佢百分百信任，經常坐烈火戰車拍拖遊車河，將生命安全交俾男友，但其實他們試過多次受傷！
「我未坐過第二個人嘅電單車，只係坐佢！不過而家年紀大，多咗意外，都唔會成日坐，最近都撞咗次車！過隧道時，攝咗埋啲石度，成架電單車跌低責住隻腳，痛咗好耐！」 Apple姐說。
至於麥德羅，早前亦因為揸電單車避大肚婆，撻低傷了肋骨！「個大肚婆望住右手邊掛住講電話，拖住幾歲嘅仔，燈都唔睇走出嚟，我唔想撞到佢，惟有避開導致自己翻車，成個撻低咗搞到斷咗肋骨，而家都仲有啲痛！」
撰文：娛樂組
攝影：黃志明
攝錄：葉志明
|
鍾意就快D Share啦！
|
|
|