神鋒C朗領皇馬登頂！「銀河艦隊」今晨喺威爾斯加的夫舉行嘅歐聯決賽，憑住首席球星C朗拿度梅開二度，以4比1大破祖雲達斯，4年內3奪冠軍，歷史性第12次封王，兼係歐聯改制而來，近27年來嘅首支衞冕冠軍，認真威威。至於今場省兩粒嘅C朗，除咗以12個入波超越美斯，成為今屆歐聯神射手之外，更係史上首位分別喺3屆決賽都入過波嘅超級射手，歐聯真皇者仲唔係佢！
今場上半場雙方拉成均勢，皇馬喺20分鐘憑一次快速反擊，由C朗接應丹尼爾卡華積傳中，離門18碼第一時間撞射入網領先。失守後嘅祖記之後積極反撲，7分鐘後就靠文迪蘇傑接應希古恩禁區內妙傳，離門18碼喺兩名守將緊逼下，倒掛射入死角，幫祖記追和1比1完半場。
換邊後皇馬加強攻勢，祖記球員開始跟唔上速度。61分鐘，皇馬中場卡斯米路一記離門30碼冷箭狂抽，省中基迪拉輕微改變方向直飛龍門左下角入網，收死保方，皇馬2比1再度領先！3分鐘後，「銀河艦隊」把握祖記球員驚魂未定，後場解圍被皇馬中場莫迪歷截得，後者推落右路底線傳中，C朗搶點射入今場個人第2球，將紀錄改寫成3比1。
形勢惡劣嘅祖記，之後踢到83分鐘，再有後備上陣嘅翼鋒古達度疑似被屈，往場邊執波輕推身邊嘅沙治奧拉莫斯，後者即時痛苦倒地，連累古達度領得個人今場第2黃被逐，祖記正式被判定死刑。90分鐘，人多打人少嘅皇馬，再有後備登場嘅馬高阿辛斯奧近門撞射得手，終為皇馬鎖定4比1勝局完場，成功衞冕！
呢邊廂，皇馬興奮慶祝奪冠，輸波嘅祖雲達斯則係連續第5次殺入決賽都係落敗收場，相當可惜，而對於接近掛靴之齡嘅保方，始終未能實現一捧歐聯嘅美夢，更係格外令人傷感。
東網體育同你追實體壇每個精彩時刻！
http://bit.ly/2ecTF2A
來源 source: http://hk.on.cc
|
鍾意就快D Share啦！
|
|
|
