誠哥身家喺過去廿年間翻了幾番，唔單只令佢香港首富之位穩如泰山，仲反映佢搵銀能力傲視一眾本地富豪。
八卦陣
誠哥𢱑銀 勁過 Bill Gates
主權移交二十年，香港變化之大遠超大家預期，其中一個變化，肯肯定係香港愈來愈有錢，例如外匯儲備，就由回歸時 817億美元，增加到上月底 4,000億美元，多到就算全港每人派港幣 40萬都派唔晒。香港富裕，同時造就咗富者愈富，咁究竟邊個富豪最識搵銀？
《壹》仔翻查美國財經雜誌《福布斯》富豪榜，原來九七年時嘅香港首富，竟然唔係誠哥，當年打入全球十大排第九位嘅係「四叔」李兆基，佢當時身家有 147億美元，折合超過 1,100億港元，即係當時佢已經係千億富豪；而緊隨四叔之後，係身家有 123億美元嘅郭氏兄弟，至於誠哥，原來佢只係全球排名第 19位，當年身家 110億美元。
不過，二十年過去，誠哥身家早已翻幾番，增加到 312億美元，就算同全球首富、微軟創辦人 Bill Gates比較，增長百分比都跑贏對方，唔只令誠哥香港首富之位穩如泰山，仲拋離埋其他幾位香港富豪；根據《福布斯》最新估計，四叔家陣身家只係有 244億美元，郭氏兄弟更因為分家，郭炳江同郭炳聯加埋只得 150億美元。
大嚿做暖男 帶住老婆去旅行
人民力量陳偉業（大嚿），去年退出政壇後，銷聲匿跡，原來麻甩佬變咗做暖男，退休呢大半年，帶住老婆周遊列國。佢同《壹》仔講，舊年十二月同老婆去加拿大，探喺嗰邊定居嘅三個寶貝女，之後順便去黃刀鎮睇北極光，玩咗兩個月。
到上月初，佢話老婆恨去英國，於是又 plan咗三個月自駕遊，玩勻英國、西班牙、巴爾幹半島同埋希臘。而家仲身在英國嘅佢，越洋向《壹》仔晒幸福，話行程玩咗一半，過多幾日就會上船玩十六日，暢遊波羅的海同聖彼得堡。
佢仲話，今次個 trip意外收穫係瘦咗十磅，「可能行得路多，同埋歐洲食得多橄欖油。」退休遊世界恨死隔籬，大嚿話個 trip暫時使咗十幾萬，不過佢唔會慳住慳住，話會盡情享受喎。佢仲話，對上一次歐遊三個月，已經係四十年前嘅事，嗰時仲係單身寡佬，所以今次同老婆一齊歎世界，係別有一番滋味。
人口變化睇真啲 Hong Kong is dying
上期《壹》仔踢爆，中共對香港殖民，用大陸人口溝淡香港人口，包括每年有近十萬大陸新移民來香港爭地搶樓。
呢班新香港人，大部分都來自香港冇審批權嘅單程證制度，好似上年就有五萬七千幾人，但呢個數字原來唔係最誇，因為回歸前一年，當時足足有六萬一千個單程證新移民嚟咗香港。另一方面，原來遷離香港人口數字都比較飄忽，好似九七年就有三萬左右人口遷離香港，但○二同○七年只得萬多人，不過喺一二年，就錄得高達四萬一千六百人移居外國。至於保安局話呢兩年估計得六、七千人決定移民離開香港，數字真係可信？
其實除咗移民人數，另一個同樣值得擔心嘅人口變化，可能係死亡數字有明顯上升趨勢，由九七年三萬一千幾人，去到○七年近四萬人，上年更有近四萬七千人死亡， Hong Kong is really dying。
本週圖片： LKS出沒注意？你諗多咗！
李嘉誠勤力就係人都知，學佢話齋如果要退休，佢五分鐘就可以退落嚟，只係佢而家唔想退啫！
香港資訊科技商會榮譽會長方保僑早幾日喺 Facebook話晨早九點未到，就見到一架掛住 LKS車牌嘅車，喺長江中心出沒。莫非就係 Li Ka Shing誠哥嘅專用坐駕？方保僑同《壹》仔講，佢好多時出中環開會都見到呢架車泊喺長江中心門口或者停車場，只可惜每次都見唔到誠哥真身。
不過，據《壹》仔所知，誠哥並唔係坐呢架車出入，佢平時其實係以寶馬代步，見到佢每次去打 golf，都係坐住架寶馬，有人仲話，架寶馬有防彈裝置添。至於呢架○五年生產嘅凌志，車牌嘅登記車主係一間叫 Luminescent International Limited嘅公司，屬長和系集團旗下公司。
撰文：巫不言
news@nextdigital.com.hk
|
鍾意就快D Share啦！
|
|
|