林偉健，名字普通且普遍，不過，若果你曾經係電視迷，每年台慶又會坐定定喺屋企，睇過肥姐踩雞蛋、五虎疊羅漢，發哥扮武松，相信你一定認得佢，仲有佢做嘅高難度體操動作。80年畢業於第9期無線藝訓班嘅林偉健。喺無線期間，雖然只分派做劇集閒角，不過，每當台慶夜，林偉健就由閒角化身聚焦人物。事關以體操員身份，曾代表香港參加過亞運嘅林偉健，要喺台慶夜使出真功夫，靠樣食飯嘅當紅小生，呢一刻，亦只能做林偉健嘅人肉佈景版，企喺側邊吶喊助威。可惜，每年台慶就只得一晚，為生計，林偉健喺90年代末期，開始涉足三級片界，好似《滿清十大酷刑之赤裸凌遲》、《偷窺樂無窮II之著草威龍》，特別係《金瓶梅》系列，佢飾演嘅西門慶，可以同若菜光、上原卡艾拉、早川瀨里奈一班日本艷星床戰，真係恨死好多宅男。不過佢話拍呢類愛情動作片，並唔係大家想像中咁享受：「其實唔享受，一啲都唔享受。鏡頭面前得你兩個人，鏡頭後面有40幾人，工作人員，打燈。」講到最難忘一次經歷，林偉健話一定係《金瓶梅》，佢話：「記得有次拍《金瓶梅》嘅時候，喺山寨同個賊婆娘奮戰，喺空中吊『威吔』，一齊打個空翻落到地下，抱住佢原地跳3分鐘。自己跳都冇氣，仲要抱住一個人跳。因為嗰時菲林貴，盡量唔好NG。體操底同埋唔好懶成日要keep住。」林偉健話除咗日本AV女優，亦有同韓國女星合作。講到點解會拍三級片，佢話當時已經離開咗TVB，做演員應該多渠道同觀眾接觸：「嗰時晶哥搵我拍《聊齋》，其實拍三級片拍床戲仲辛苦過拍打戲。啲女演員演員道德好好，我哋好尊敬佢。有場喺台灣拍監倉戲，試戲時已經畀啲蝨咬到成身都係，個女演員話唔使唞，拍完都冇一句怨言。」原來佢拍咗10幾部三級片之後，都有問晶哥點解自己都成47歲，仲搵佢拍，晶哥就話：「幾好吖，都冇乜點變。又有經驗，又少NG。」講到印象最深就係訓練班出嚟，已經同周潤發發哥合作拍古裝片《孤城客》，佢話：「亦都係同發哥第一次合作拍嘅古裝戲，呢套劇我係做第二線男主角。」如今50有6嘅林偉健，依然有返大陸拍劇，近日為新劇，更將頭髮染成金色。
| 攝影(右)：陳慧安 | | |
| | | |
| | |
|
鍾意就快D Share啦！
|
|
|